L'álbum nuevu d'Anabel Santiago tien bases electróniques de Fruela 757

La cantante Anabel Santiago presentó esti martes nel Teatru Campoamor d'Uviéu'l so trabayu nuevu en solitariu tituláu Y_Andá. Esti trabayu nuevu, que cuntó cola collaboración de Dj Fruela 757 pa la fusión de les sos temes con música electrónica, va tar disponible dende esti martes en plataformes dixitales y a partir del xueves nos puntos de venta.

El Teatru Campoamor foi'l sitiu escoyíu pola artista pa la presentación d'esti trabayu porque según indicó «ye onde con trece años nací como artista» al principiar a cantar tonada tradicional nel concursu de folklore Ciudad d'Uviéu. Según esplicó Anabel Santiago a Europa Press, foi «el so puntu de partida» y güei ye'l so «puntu d'inflexón» porque «partía d'un conceptu mui clásicu, pero'l clasicismu yá queda atrás».

Nel actu de presentación tuvo acompañada pola vicealcaldesa d'Uviéu, Ana Taboada, el conceyal de Cultura, Roberto Sánchez Ramos, y Javier Suárez conocíu como dj Fruela 757. Esti octavu álbum, formáu por diez cantares, ta compuestu de «munchos caprichos musicales» que recueyen cantares tradicionales de la Península Ibérica, amás de cantares y dances tradicionales asturianos llevaos a la pista de baille cola música electrónica, esplicó.

L'artista apuntó que'l nome significa «ehí queda eso» y vien d'una espresión qu'emplea al acabar un cantar con muncha fuercia. Esta espresión pareció-y «afayadiza» pa resumir la esencia del discu. Nesti proyectu cuntó cola incorporación del Dj Fruela 757, que se sumó a la so banda de músicos, Chus Naves, Emilio Fidalgo y Manuel Cordero, a lo que punxo en valir pola so tolerancia y versatilidá a los cambios. Nesti sentíu, añadió que con ellos la producción artística y musical foi «mui fácil».

Anabel dixo que mostró'l so interés por conocer al dj «al sentir que daquién ensin permisu» amestaba los sos cantares de música tradicional con electrónica. Cuenta qu'al sentilo quedo ablucada, yera «dalgo rompedor y creativo». Dende entós principiaron trabayar xuntos, primero cola xira Electronic Llances, que los llevó per Suiza, Francia, Madrid y Llevante y depués punxéronse trabayar nel álbum qu'esti martes presentó. Cola xira queríen «ver reacciones» y «la respuesta del públicu foi mui positiva», añadió la cantante.

P'acabar anunció que tien zarraes cinco feches de conciertos pal 2019. Van ser nel auditoriu de Piedrasblancas en xineru, en Piloña y Mieres en marzu, y n'Avilés y Madrid n'abril. Coles mesmes, mostró'l so interés por actuar nes fiestes de San Mateo.