La tarabica de David Rivas

Güei ye un día murniu p'Asturies y especialmente pa les persones que tenemos una sensibilidá asturianista. Esta nueche, de forma inesperada y enantes de tiempu, dexónos a los 67 años l'escritor, economista, profesor, activista y divulgador de la cultura tradicional asturiana David M. Rivas.

Rivas yera una d'estes persones que nel movimientu asturianista llamamos «hestóricu». Militante dende qu'entamó los sos estudios del Conceyu d'Asturies en Madrid, espeyu de la organización Conceyu Bable pa los asturianos y asturianes migraos ellí, nun paró dende entós de formar parte d'iniciatives culturales y polítiques.

Foi miembru del partíu Conceyu Nacionalista Astur (CNA) y candidatu d'Andecha Astur, siempres compaxinando la so militancia política cola sensibilidá ecoloxista, siendo unu de los fundadores d'ANA (Asociación Asturiana d'Amigos de la Naturaleza) nos años setenta y más tarde miembru del Club de Roma. Nos partíos y nes organizaciones, anque entendía la llealtá, foi siempres un versu sueltu, con perfil propiu y arguyosu de les sos propies contradicciones.

Entamó los primeros estudios d'impactu económicu sobre l'asturianu dende'l so fondu saber como profesor d'Estructura Económica de la Universidá Autónoma de Madrid.

Tuvi la suerte de compartir con él munchos momentos de llabor cultural, sobre manera xunto a Humberto Gonzali, na Arribada de Xixón, amás de face-y delles entrevistes fondes, la primera va venti años, falando nel programa «Asina foi… El Surdimientu», de los 30 años de Conceyu Bable y del so Conceyu d'Asturies en Madrid. Grabélu tamién pa dellos documentales sobre la cuestión llingüística, y nellos apurrió siempres una visión clara sobre los efectos positivos de la oficialidá pa la economía asturiana.

Yera compañeru, como miembru correspondiente, de l'Academia de la Llingua Asturiana, na qu'entró munchos años enantes que yo. Como lo fuere tamién, de clas, del mio tíu Poldo, nos Xesuites de Xixón. Lo que-y facía nutrime davezu d'anécdotes familiares variaes, que cuntaba como naide.

Rivas y los sos collacios del Conceyu d'Asturies llevaben unos meses trabayando p'atropar y organizar tolos documentos d'aquella organización, empobinaos al homenaxe que se-y prepara pa la Selmana de les Lletres Asturianes del 2025 al so líder, Xosé Álvarez Fernández «Pin», yá desapaecíu tamién. Foi Pin precisamente, col so últimu testu enantes de finar, quien-y prologó'l so llibru de rellatos «Xente de perende».

Divulgador de la cultura asturiana, especialmente de la sidrera. Tien un llibru imprescindible sobre la cuestión y participó como asesor de la candidatura de la cultura sidrera asturiana a Patrimoniu Inmaterial de la Humanidá.

Reconocíu masón, na Gran Loxa Unida d'Inglaterra, la so elegancia lliberal y anglófila facía que Rivas gastare nes ocasiones formales una tarabica en cuenta de la corbata. Y con esa imaxe elegante y la so sorrisa eterna y fina ironía xixoniega convirtióse nun pequeñu gran iconu del asturianismu. Un iconu que se reconocía como repunante militante, pero que, como toles sos militancies yera crítica. La so sorrisa y afabilidá convertiénlu nun repunante amable, fuera del arquetipu de la repunancia más ortodoxa.

David yera una de les persones con una conversación más amena y divertida que conocí, un militante que fixo perbones aportaciones teóriques a la reivindicación llingüística n'Asturies y al que, nel chigre, como collaciu, y nos seminarios, como espertu, vamos echalu abondo en falta.