Escueles d'arte y tecnoloxía pal sieglu XXI
Escolinos
El proyectu educativu AuLAB quier dai un impulsu a la formación de los mozos en tecnoloxía, ciencia y creatividá coles mires d'ameyorar el so futuru llaboral
10 Jul 2019. Actualizado a las 10:00 h.
Familiarizar a los estudiantes con l’entornu dixital y dai un impulsu a la so relación ente tecnoloxía, ciencia y creatividá, coles mires d'ameyorar la so formación y preparar meyor a los mozos pal so futuru llaboral. Esta ye la base del programa AuLAB, una iniciativa de Laboral Centro de Arte y Creación Industrial, financiada pola Fundación ALCOA, qu'esti cursu cuntó cola participación de 3.218 alumnos y docentes de trés centros educativos d'Avilés.
Col lema Escueles d'Arte pal sieglu XXI, esti proyectu educativu centróse nel desarrollu d'un llaboratoriu multimedia en cada centru: colexos de Santo Ángel y San Fernando y el IES Ramón Menéndez Pidal, y foi dirixíu polos artistes María Castellanos, Alberto Valverde y Daniel Romero. Dende la so inauguración, el cursu pasáu, la iniciativa creció exponencialmente al pasar de 270 estudiantes a más de 3.000.
El desenvolvimientu del programa ta basáu en diverses esperiencies educatives afeches a los distintos ritmos d'aprendizaxe, según la ufierta de talleres rellacionaos con tecnoloxíes innovadores. Asina, esti programa de Laboral Centro de Arte y Fundación ALCOA integra los nuevos métodos dixitales na llínea pedagóxica tradicional.
A lo llargo del cursu, los estudiantes trabayaron con ferramientes de diseñu 3D y otros preseos y materiales electrónicos (microcontroladores, wearables, pintures conductives), y afondó na creación multimedia con Unity o el mapping interactivo.