Cerezal presenta'l so discu nuevu esti sábadu en Siero

El grupu Cerezal va presentar el so trabayu nuevu, La cereza'l cielu, esti sábadu 18 de xineru, nel Teatru Auditoriu de La Pola Siero, a les 20.00 hores. La cereza'l cielu ta grabáu y mezcláu nos estudios Tutu y masterizáu nos estudios Green Desert. Esti trabayu inclúi trece cortes que van desendolcando'l soníu propiu del grupu: ente'l folk acústicu y'l pop-rock, cola novedá del usu de recursos más propios de la música ellectrónica.

Nel discu, publicáu col sellu Producciones Fitoria, el grupu cuntó coles collaboraciones de Juan Duarte y Ruboh a les voces, Nel Suárez (guitarra acústica), Álvaro Bárcena (guitarra elléctrica, Dobro y steel guitar), Fernando Oyagüez (Banjo), José Manuel Tejedor (Gaita), Rodrigo Joglar (Curdión), Xurde Fernández (Whistle), Pedro Santiago (Bodrhan), Javi Tejedor (Curdión), Marco A. Guardado (percusión), Rubén Alba (Gaita) y David Mori (Xiblata).