«Asturies si yo pudiera...»

Escribía Pessoa que «Minha pátria é a língua portuguesa» (la mio patria ye la llingua portuguesa), de dalgún mou la llingua pa él yera la patria y viceversa. Y ye que l’idioma que falamos o’l sitiu d’onde somos quiciabes nun tengan porque defininos o determinanos, pero sí nos define lo que queremos falar y qué queremos pa la tierra na que queremos vivir.

Dacuando me llamen pa participar en debates o charres sobre l’asturianu y recuerdo una conversación interesante na que, falando de qué pasaba a los políticos asturianos col so propiu idioma, llegamos a la conclusión de qu’esta visión nun yera más qu’un reflexu del so posicionamientu hacia Asturies y los sos problemes. Dicho d’otra forma, dende esti prisma, quien ta preocupaú pol asturianu, ta tamién esmolecíu pol restu les coses del so entornu. Esto puede estendese tamién a la ciudadanía. Y ye que nestes selmanes les movilizaciones pola Educación pública asturiana, de solidaridá con Palestina, escontra’l Vial de Xove, escontra la Contaminación o polos Derechos Llaborales taben copaes casi siempre por un garrapiellu de xente que tamién se vio na manifestación pola Oficialidá del pasáu sábaduo 4 de mayu. La defensa del asturianu n’Asturies ye una llucha más dientro de les revindicaciones democrátiques y ye por tanto ún de los elementos que ye motor de cambiu pa les demás cuestiones. Ye un motor de cambiu y una rempuesta a l’Asturies que nos dan por (des)fecha y en decadencia, pa ufrir una Asturies con puxu y futuru pola que tenemos de nagüar.

Nun hai una diferencia ente Asturies y el so idioma, nun son cuestiones que se puedan separar una d’otra por más qu’haya quien lo diga munches veces o mui alto: nun hai un «los del bable», un «los del chringuito», frente a una indefensa e influenciable sociedá asturiana a la que quieren «imponer» nada o a la quieren quitar «llibertá». Hai una xente que constrúi y que ta lluchando por esti país y otra que destrúi, facilitando qu’esta tierra seya un paraísu pal especulador y pal turismu, probablemente pal so llucru o’l de los sos mandatarios; y toos sabemos quien tábemos estes selmanes cola sociedá asturiana defendiendo’l bien común y quien non: ye simple. La nuestra patria ye la nuestra llingua y la nuestra patria ye la de la integración, la llucha polos derechos civiles (toos), la llucha pola memoria democrática que s’integra de forma histórica cola propia idea d’Asturies.

¿Saben que va pasar si s’aprueba la oficialidá? obviamente, hai distintes visiones y distintos escenarios posibles, lo que sí va asoceder s’apruebe o non esta reforma, ye que’l movimientu de reivindicación llingüística va siguir y siguir pidiendo dignidá y futuru pa esta llingua y munchos vamos siguir pidiendo dignidá y futuru pa esta tierra, como llevamos faciendo décades…y asina va siguir siendo. ¿saben por qué? porque lo que nos mueve ye l’amor a Asturies y a la so xente, pola nuestra familia, polos nuestros amigos, pola xente que vino o vien a buscar un futuru meyor. Por eso defendemos l’asturianu, porque creemos na democracia y porque resulta que la fórmula única pa garantizar y democratizar de forma plena la pervivencia d’esta parte del nuestru patrimoniu, ye constitucionalmente la oficialidá. Nun hai medies tintes: o hai oficialidá o nun hau futuru pal asturianu. Y volviendo a la reflexión inicial, negar o enredar con esto ye tener una visión d’Asturies poco o nada tresformadora; l’alternativa a la non oficialidá yá la tamos viviendo y nun ye esperanzadora precisamente. La oficialidá nun traería la solución a tolos males, pero sí traería autoestima colectiva, asentaría puestos de trabayu n’Asturies y pondría a esta comunidá nel circuitu cultural de les llingües oficiales del Estáu, colo qu’eso supondría pa les industries creatives asturianes ente otres. Sería una inversión (con un costu, obviamente) pero que diba tener un impactu positivu nel nuestru territoriu a mediu plazu. Y ye más, anque «al cocer menguase» y nun fuese pa tanto, l’intentu merecería la pena, porque significaría qu’Asturies tien daqué más que dicir, que servir un bon cachopu o ser un paisaxe guapu pal visitante ocasional, ye facer a Asturies partícipe de los drechos qu’esfruten con xusticia y normalidá otres comunidaes autónomes non mui llonxanes.

Si escribía Pessoa que la so patria yera la so llingua, fagamos lo propio y tengamos amplitú de mires y qu’esa «Asturies patria querida» a la que cantamos nun pase la vida diciendo «si yo pudiera, si yo pudiera…»