«Nun tengo nenguna dulda de que los asturianos vais facelo bien», afirma De la Vega sobre'l debate de la oficialidá

La presidenta del Conseyu d'Estáu, María Teresa Fernández de la Vega, esperó «consensu y respetu» nel debate sobre la reforma del Estatutu d'Autonomía d'Asturies y el tema principal de la oficialidá del asturianu y el gallego-asturianu. Con too, la que foi la primer muyer vicepresidente del Gobiernu d'España indicó que magar ser un asuntu «complicáu y sensible», nun tien «nenguna dulda» de que los asturianos «vais facelo bien, como siempre fixistis, polo tanto toi bien tranquila».

Asina lo indicó en declaraciones a los medios minutos enantes de participar na inauguración del ciclu del Ridea «Histories y prospectivas sobre 40 años de autonomía asturiana», onde impartió la conferencia «Los primeros 40 años de la autonomía asturiana en una España democrática».

Precisamente, esti miércoles, 15 d'avientu, cúmplense 40 años de l'aprobación de la llei del Estatutu d'Autonomía pal Principáu d'Asturies nel Congresu. Nesi sentíu, De la Vega destacó qu'esti testu permitió qu'Asturies «avanzara nuna configuración propia en percorriendo un camín difícil», anque, indicó, «percorríu con muncha dignidá y altor de mires, ensin perder de vista los intereses de la ciudadanía».

Preguntada sobre'l procesu de reforma que vive'l testu y la cuestión clave de la oficialidá, la presidenta del Conseyu d'Estáu indicó qu'esti tema «ye dalgo que tienen que decidir los asturianos, como decidieron tolo que fixeron en rellación col tema de l'autonomía».

«Ye un tema complicáu y sensible y la recomendación meyor que pue facese ye que lo faigan como fixeron siempre, con consensu y respetu», afirmó, p'añadir que «los consensos constrúyense con voluntá, diálogu, debate y respetu y equí fíxose siempre asina».

Preguntada sobre les posiciones contraries a esti debate, ente les que destaca l'ex presidente socialista José Luis Rodríguez-Vigil, De la Vega señaló qu'eses diverxencies son «lóxiques» nel empiezu d'un debate «que ye complicáu». Con too, quixo dexar claro que nun tien «nenguna dulda de que los asturianos vais facelo bien, como siempre fixistis, polo tanto toi bien tranquila».