Un total de 1.900 ganaderos sofiten la demanda colectiva escontra'l cártel llacteu

Un total de 1.900 ganaderos que vendieron lleche crudo de vaca ente los años 2000 y 2013 sumáronse a la demanda colectiva impulsada pola empresa xurídica Eskariam escontra'l cártel llacteu pa recuperar les perdes económiques que supunxo l'alcuerdu de precios ente industries del sector.

El plazu pa la reclamación masiva vencía'l pasáu mes de xunetu y, según los datos facilitaos a Efe pola empresa, finalmente sumáronse a la demanda 1.900 ganaderos coles mires de llograr desquitase de los daños causaos por unes práctiques que califiquen como «anticompetitives».

Al so xuiciu, Asturies ye una de les autonomíes más penalizaes poles práctiques del cártel de la lleche que provocó la vienta de producción a un preciu «cada vez menor». Recuerda que'l fallu de la Comisión Nacional de los Mercaos y de la Competencia (CNMC) en xunetu de 2019 punxo de manifiestu que, ente 2000 y 2013, les empreses tresformadores de lleche intercambiaron información, a nivel nacional y rexonal, sobro precios de compra de lleche crudo de vaca, volúmenes de compra y escedentes de lleche, con consecuencies económicamente «insostenibles» pa los ganaderos españoles.

La empresa xurídica soscribió dos convenios col despachu internacional Hausfeld pa dota-y de mayor financiamientu y la compañía especializada en peritaxe Compass Lexecon pa la cuantificación de los daños.

Competencia cifró en 80 millones d'euros les multes a empreses y asociaciones del sector llacteu en reabriendo'l procesu entamáu pa intercambiar información pa influyir nos precios que se pagaben a los ganaderos.