La crisis de l'Asturies rural: l'únicu bancu de Somiedu namái va abrir trés díes a la selmana

La despoblación del mundu rural ye un fenómenu que paez imparable n'España. Los políticos pasen de llau, inclusive en campaña electoral, per un problema que s'agravó nos últimos años y que s'agrava en comunidaes avieyaes como Asturies. Los pueblos vacíense y los conceyos más pequeños pierden atractivu pa les empreses. L'últimu exemplu ye Somiedu, que va ver cómo l'únicu bancu que tien va amenorgar el so horariu d'apertura al públicu y namái va abrir trés díes a la selmana.

Según informa'l periódicu La Voz del Trubia, l'únicu bancu que tien oficina abierta en Somiedu va abrir namái trés díes a la selmana, pelo menos, hasta fin d'añu. La entidá anuncia la midida nun cartelu informativu y aliega «motivos operativos». Los díes d'apertura al públicu van ser los llunes, miércoles y vienres nos meses de payares y avientu.

Como alternativa, el bancu unvia a los sos veceros a los servicios de banca online, al caxeru o a la oficina más cercana, asitiada en Balmonte, a 30 quilómetros de distancia. Los vecinos tarrecen que la decisión de Liberbank seya un pieslle parcial enantes d'un pieslle total.