La «Piedra del Rayu», l'hachu «máxicu» de va 5.000 años que relluma en Xixón
Actualidá
El Muséu de les Termes Romanes espón una ferramienta cargada de simboloxía pol poder máxicu que-y atribuyían
28 Oct 2019. Actualizado a las 05:00 h.
La «Piedra del Rayu» ye una ferramienta del neolíticu cargada de simboloxía. Los romanos atribuyíen-y propiedaes máxiques, por eso la soterraban cuando llevantaben nueves edificaciones o pa evitar perder les colleches. Magar que yera un vezu xeneralizáu, namái se caltien unu en tol país, y hasta final d'añu va esponese nel Muséu de les Termes Romanes de Xixón.
La pieza escoyida ye un hachu apolazáu d'orixe neolíticu perteneciente a la colección de la Villa Romana de Veranes y topada na escavación del horreum de la villa. Foi depositada de forma intencional nos cimientos del horreum (datáu nel últimu terciu del s.I d.C.) como oxetu ritual y protector de les colleches.
Según espliquen dende'l muséu, esta pieza ye testimoniu material de «un universu de creyencies y ritos que s'enllarguen nel tiempu, venceyaes a un mundu agrariu güei n'escayencia». La esposición acompáñase d'una instalación sonora y audiovisual na que se recreen les antigües creyencies d'un mundu agrariu que pocu o nada tien que ver col d'anguaño.