El PP, reincidente nel vetu al asturianu

La Llei d'usu y promoción del bable-asturianu, vixente n'Asturies establez que «tolos ciudadanos tienen derechu a emplegar el bable-asturianu y a espresase nél, de pallabra y per escrito» y tamién que se va tener por válidu a tolos efectos l'usu del bable asturianu nes comunicaciones orales o escrites de los ciudadanos col Principáu d'Asturies». Sicasí, dende'l Partíu Popular llanzóse una iniciativa pa que la nueva conseyera de Cultura, Berta Piñán, nun use la llingua asturiana na so intervención na cámara pa esponer les prioridaes del so departamentu.

Esta resistencia del principal partíu de la oposición provocó una reacción de numberosos colectivos ya inclusive un pidimientu de recoyida de firmes n'apoyu a la conseyera y un «hashtag» en redes sociales #YotoiconBertaPiñán.

Pero'l vetu del PP al asturianu nun ye nuevu y tampoco ye la primer vegada na que se fai asina d'esplícitu. La pasada llexislatura, y tamién dempués d'oponese al usu del asturianu nel parllamentu nuna comisión convocada p'aldericar sobre la llingua, la presidenta del partíu Mercedes Fernández, presumió na so cuenta de Twitter «Hemos logrado que el castellano sea la única lengua del parlamento en Asturias».

N'ochobre del añu pasáu, un conceyal del PP en Castrillón dixo que l'usu del asturianu nel plenu podría ser «illegal» y tamién que nun quería utilizar esta llingua porque «yo nun quiero que me llamen aldeanu». Nel plenu aldericábase una moción sobre l'impulsu a la oficialidá del asturianu cuando Pablo González-Nuevo Quiñones calificó l'usu del asturianu nel consistoriu como un «esperpentu» qu'esperaba que nun volviera repetise.

Otra conceyala del PP, Marián Velasco, en Noreña esixó que se lleera en castellán una moción escontra la ludopatía que presentara n'asturianu'l grupu llocal de Conceyu Abiertu por Noreña. Naquella ocasión Velasco usó argumentos similares, que nun entendía delles palabres y afirmando que l'español yera la única llingua oficial pa ser usada nel plenu.