Estos son los tos derechos si te cancelen un vuelu (anque seya por una fuelga)

Ye una de les imáxenes habituales del branu. Cancelaciones o retrasos de vuelos que dexen a los pasaxeros tiraos nos aeropuertos, munchos d'ellos cola perda d'enllaces y les consecuencies qu'ello tien. Pero, anque munches vegaes nun se sepa, los afectaos tienen derechu a reclamar, inclusive en casu de fuelga.

La Unión de Consumidores de Asturias (UCE) sostien que cuando un compañía aérea anuncia la convocatoria d'una fuelga de los sos emplegaos, yá nun puede invocase la esistencia d'una «fuercia mayor o circunstancies escepcionales» que ye lo que suelen alegar pa evitar el pagu de compensaciones económiques. ¿Por qué? Porque esiste una convocatoria previa y la compañía aérea ha de tomar toles midíes necesaries pa evitar molesties a los sos pasaxeros. Asina lo reconocen los tribunales de xusticia n'España. Amás, el Tribunal de Xusticia de la Xunión Europea acaba de considerar que tamién esiste derechu a solicitar indemnización nel casu de fuelgues selvaxes (aquellos ensin alcuerdu).

¿Qué derechos tengo si'l mio vuelu resulta canceláu o retrasáu por fuelga?

-Derechu a recibir información de la compañía dende'l primer momentu.

-De magar les 2 hores de retrasu, derechu a recibir asistencia como comida y bébora, llamaes, estancia nun hotel si ye preciso.

-Solicitar el reembolsu del billete nun plazu máximu de 7 díes.

Y si hai cancelación o gran retrasu de 3 o más hores en llegar al so destín, puede solicitase tamién la compensación económica correspondiente, en función de:

-Pa viaxes inferiores a los 1.500 kilómetros, la indemnización ye de 250 euros.

-Pa la media distancia (ente 1.500 y 3.500 kilómetros), de 400 euros.

-En trayectos de más de 3.500 kilómetros, 400 euros en vuelos intracomunitarios y 600 euros nel restu de vuelos.

Casos nos que nun hai derechu a compensación

-Si informaron de la cancelación del vuelu con 2 selmanes d'antelación.

-Si informaron de la cancelación del vuelu ente 2 selmanes y 7 díes previu a la salida del vuelu y el nuevu vuelu ufiertáu pola compañía sal con 2 hores d'antelación cómo máximu de la hora prevista de salida.

-Si informaron de la cancelación del vuelu'l mesmu día de la so salida o con menos de 7 díes d'antelación a la mesma y el nuevu vuelu ufiertáu pola compañía sal con 1 hora d'antelación cómo máximu al previstu orixinalmente y llega al so destín final con menos de 2 hores de retrasu al previstu.

-Si la compañía ufierta un tresporte alternativu y llegues al to destín final con menos de 3 hores de retrasu sobro la hora de llegada prevista.