Semando Fest, el festival de música moza n'asturianu, celebra la so tercer edición n'Uviéu

Entama la cuenta atrás pa qu’aporte’l III Semando Fest, el festival de música moza n’asturianu qu’axunta grupos d’estilos estremaos pa reflexar la diversidá sonora d’esta escena. Con un 40% del aforu yá vendíu —les dos anteriores ediciones escosaron entraes—, el 8 de febreru a les 21 hores van actuar en Lata de Zinc Abéu, Ferla Megía, Alienda y Melandru coles sos propuestes de música tradicional, urbana, folk y rock. Amás, esti añu incorpórase una novedá al eventu: la Semando Folk Session que va facese’l vienres 7 a les 22 hores en L’Esperteyu y nel que pueden participar llibremente tolos músicos y músiques menores de 35 años que quieran tocar nesta jam. 

El Semando Fest, según espliquen na organización, «va más allá de ser un simple conciertu y por eso tien toa una filosofía caracterizada por puxar pol relevu xeneracional na música asturiana, por ufrir un festival con un formatu orixinal qu’entemeza aspectos d’una gala colos d’un conciertu, que reivindica les sales de conciertos como un espaciu afayadizu pal exposigue de la música de raigañu, qu’apuesta por da-y oportunidaes a les y los creadores xóvenes y que trabaya por avanzar hacia la igualdá dientro de la música».

Musicasturiana.com y Ixuxú Cultura entamen esti eventu que nesta tercer edición va axuntar a Abéu cola so música tradicional axeitada pal baille; Ferla Megía, col so amiestu de pop, folk, triphip, dembow o rap; Alienda, banda de power folk que sigui’l camín de los meyores nomes del folk asturianu; y Melandru, formación de post-rock influyía pol shoegaze, dream pop y el folk.

Les entraes anticipaes yá tán a la venta en musicasturiana.com a 12 euros (10 euros pa persones menores de 26 años).

Semando Folk Session

La tercer edición del festival incorpora una novedá: la Semando Folk Session, una oportunidá pa que toles músiques y músicos mozos que quieran, andechen pa interpretar a comuña los sos temes preferíos de la música tradicional y folk asturiana. La cita va ser el vienres 7 de febreru a les 22 hores en L’Esperteyu (Uviéu) y nella pueden participar los y les instrumentistes que tengan gana de tocar nesta jam session pionera. Hai un formulariu pa inscribise, anque nun ye obligatoriu rellenalu.

Amás, pa celebrar esti III Semando Fest, va una selmana Musicasturiana.com asoleyó la playlist Semando música moza n’ast, que complica cantares d’anguaño y d’antaño d’estilos estremaos cola característica de que quien los grabó nesi momentu fueron artistes xóvenes de la escena.