El talentu del arte gráficu solidarizáu con Les 6 de La Suiza
Agora
El grupu Sofitu a Les 6 de La Suiza va presentar la esposición Arte poles 6, una colleición de 39 obres que s'esponen repartíes en tres llocales de Xixón
10 Jan 2025. Actualizado a las 13:35 h.
El grupu Sofitu a Les 6 de La Suiza va presentar la esposición Arte poles 6, una colleición de 39 obres d’arte gráficu que s’esponen repartíes en tres conocíos llocales xixoneses. Esti sábadu, 11 de xineru, a les 19 hores, fáese la presentación nel café-llibrería La Habitación Propia y a les 21 hores na cervecería Vendetta. El domingu, 12 de xineru, a les 13 hores, hai una presentación con sesión vermut nel bar La Vida Alegre.
Trátase d’una orixinal esposición de 39 imáxenes creaes por destacaes artistes gráfiques comu amuesa de solidaridá coles trabayaores y sindicalistes del conocíu casu Les 6 de La Suiza, «condergaes pol aparatu represor del Estáu por exercer los sos llexítimos drechos sindicales».
Nel actu presentación de la esposición Arte poles 6 van participar l’artista gráfica Cris Mencía y representantes del grupu Sofitu a Les 6 de La Suiza. Esta esposición, según espliquen dende'l grupu, ye una amuesa de cómu l’arte tien la capacidá de frañer les muries de silenciu coles que’l poder quier arrodiar la llucha de la clas trabayadora.
«La rempuesta comprometía d’estes artistes ye una demostración descomanada de talentu y tenrura, al tiempu que representa un pasu importante na xeneración concenxa y solidaridá cola causa de les 6 condergaes nel casu La Suiza», añeden. Tamién conviden a tola xente solidario de Xixón a conocer la esposición nesos tres llocales, a los qu’agradecen enforma la so collaboración.