La Fabriquina inaugura la so nueva colección d'ensayu con «Diarios d'una panderetera» de Leticia Baselgas

La Fabriquina inaugura la so nueva colección d'ensayu, Manifiestu, con Diarios d'una panderetera de Leticia Baselgas. L'artista asturiana, referente de la pandereta y mitá del popular dúu de post-folk-asturianu L-R, firma el primer númberu d'esta colección que busca recoyer l’actual pensamientu asturianu, «el que piensa sobre Asturies y el que se piensa dende Asturies», nun formatu breve y accesible.

El llibru, que llegará esti mes d’avientu a les llibreríes, ye de llectura imprescindible tanto pa quien busca afondar nos símbolos que construyen la idea d’Asturies como pa cualquier persona interesada nos procesos de recuperación y reproducción de la tradición.

Tradición, identidá y autenticidá son conceptos alredor de los que Leticia Baselgas (Xixón, 1984), una de les panderetes más importantes del panorama musical n’Asturies, lleva reflexonando de magar yera una neña y que, agora, aborda en forma d’ensayu nestos trepidantes diarios personales escritos per más de dos décades.

Con ritmu cinematográficu y la guía d’una documentada brúxula teórica, Baselgas rellata les sos primeres esperiencies nun grupu de baille marcaes pola disciplina y l’imaxinariu folclóricu posfranquista; el so posterior desencantu cola música tradicional y el rigorismu etnográfico; y, pa cabu, la so llegada al conceptu de post-folk-asturianu como un espaciu de llibertá creativa.

Leticia Baselgas ye cantante, panderetera y artista visual. Ye doctora n’Arte na Universidá d’Uviéu y nos últimos años punxo en práctica la so tesis principal a traviés del conceptu post-folk-asturianu, que trabaya y esperimenta cola resignificación de la praxis na música tradicional asociada a la pandereta, al empar que propón modelos alternativos pa la so aparición y desarrollu nes esferes públiques.

Diarios d'una panderetera presentase el próximu xueves 5 d’avientu en Xixón, a les 19 hores nel bar-tienda El Arca (c/Escultor Sebastián Miranda, 3. Cimavilla) y contará cola presencia de l’autora, el prologuista de la obra, David Guardado, y la consultora de xéneru y musicóloga Laura Viñuela. La presentación n’Uvíeu será el vienres 13 d’avientu, a les 19 hores, na Llibrería Matadero Uno (Plaza de Riego, 1), con Baselgas, Guardado y la llibrera Natalia González Menéndez.