L'espectáculu «Perendi», de La Compañía del Alba, gana'l Premiu Nel Amaro de teatru n'asturianu
Agora
El xuráu resalta l'trabayu actoral y destaca «el testu inusual pola estructura y contemporaneidá, de cohesión estraordinaria»
23 Oct 2024. Actualizado a las 11:45 h.
La Compañía del Alba acaba de ganar el VIII Premiu Nel Amaro de teatru profesional n’asturianu col espectáculu Perendi. El xuráu d’esti gallardón impulsáu pola Conseyería de Cultura, Política Llingüística y Deporte destacó de Perendi que se trata de «una obra novedosa a nivel dramáticu, qu’innova nos llugares comunes que resulten nun ser tales” con un testu “eficaz, resueltu escelentemente pol equipu d’actores y actrices».
Los actores Carlos Alba, Carmen Gloria y Cova Lobos dan vida al testu de Milio Rodríguez Cueto, qu’adapta rellatos publicaos nel diariu La Nueva España ente los años 2000 y 2010. Nesta obra d’humor negru con tintes costumistes ambientada nun conceyu asturianu imaxinariu llamáu Perendi, cuéntase la historia d’una moza que presenta una tesis doctoral na Universidá de Wisconsin sobre un pintor local d’orixe siriu que tenía’l poder d’albidrar nos sos cuadros muertes y desgracies.
Perendi llegó a la final del Nel Amaro xunto a les producciones Amanda y les castañes máxiques (Ambigú Media Broadcast), Gasolina con capullos (Higiénico Papel Teatro) y Formigues (Elektra Fiktion). Estos espectáculos representáronse a lo llargo del mes d’ochobre nel Teatru Filarmónica d’Uviéu, a lo llargo del festival de teatru que lleva’l mesmu nome que’l premiu.
Nesta edición, amás, el festival incluye la representación de la obra El gorrumbu, de Saltantes Teatro, que resultó ganadora na edición del 2023, esti vienres, 25 d’ochobre, a manera de piesllu.