El FICX defende'l cine cara a cara na so 62 edición

«El cine cara a cara». Asina ye como'l Festival Internacional de Cine de Xixón va convertise, del 15 al 23 de payares, nun espaciu d'alcuentru ideal ente públicu y cineastes nel que la ciudá va alquirir, tamién, la so dimensión protagonista. Nesta 62ª edición, el FICX va proyectar 75 (co)producciones españoles, lo que refuerza'l so compromisu col cine del estáu. Amás de desvelar 6 títulos de producción estatal dientro de la so Sección Oficial de Curtiumetraxes, el Festival anuncia yá la totalidá de títulos que completen los sos dos principales secciones competitives: Albar y Retueyos.

La Selección Oficial Albar descubre su fascinante programación al completo

Seis títulos nuevos completen la Sección Oficial Albar xunto a les películes anunciaes con anterioridá: L’Empire de Bruno Dumont; Good One de India Donaldson; Eight Postcards From Utopia de Radu Jude & Christian Ferencz-Flatz; Retaguardia de Ramón Lluís Bande; La prisonnière de Bordeaux de Patricia Mazuy; Vulcanizadora de Joel Potrykus, Tú me abrasas de Matías Piñeiro y Dying de Matthias Glasner.

Le roman de Jim (Francia) ye l'últimu llargumetraxe de los hermanos Arnaud Larrieu & Jean-Marie Larrieu. Una emocionante semeya de la paternidá que llega a la Sección Oficial Albar tres el so estrenu en Cannes Premiere. Los directores franceses, que compitieron pola Palma d'Oru en Cannes con Pintar o hacer el amor en 2005, clausuraron la edición del FICX en 2021 cola so película Tralala. Los sos trabayos escoyéronse en Festivales como Locarno, San Sebastián, Londres o Rotterdam.

Espertu en retratar les incógnites de la naturaleza humana, el prolíficu director surcoreanu Hong Sang-soo, yá un clásicu na programación del Festival, presenta By the Stream (Corea del Sur). El doblemente ganador de la Sección Oficial del FICX convida a reflexonar cola so última obra sobre la creación. Y failo al traviés d'una artista y profesora universitaria a la que da vida Kim Minhee, merecedora del Lleopardu a la Meyor Actriz nel Festival de Locarno.

El director suecu Gustav Möller presenta en Condenados (Dinamarca, Suecia) un esmolecedor thriller psicolóxicu que pon en xaque'l sentíu de la xusticia de la celadora d'una cárcel, brillantemente interpretada pola multipremiada actriz Sidse Babett Knudsen. El filme llega al Festival tres el so pasu pola Sección Oficial de Berlín.

Ray Yeung ufierta con All Shall Be Well (China) una mirada distinta sobre l'amor ente dos muyeres d'avanzada edá nuna contorna nel que ye importante guardar les apariencies. La temática LGTBI ye habitual na obra del cineasta chinu, que tuvo percorríu en certames internacionales como Berlinale, onde llogró'l Premiu Teddy col so nuevu trabayu.

Los malditos (Italia, Estaos Xuníos, Bélxica) ye una revisión de la Guerra Civil estauxunidense dende'l prisma de Roberto Minervini. El director italianu firma per primer vegada un llargumetraxe dafechu de ficción y con ecos de post-western tres realizar, con una visión mui personal, obres de non-ficción como The Other Side (Louisiana) o Stop the Pounding Heart, nos que retrató l'América fonda. Los malditos llega a la Sección Oficial del FICX tres recibir el Premiu a la Meyor Dirección Un Certain Regard en Cannes.

El meyor representante de la comedia romántica-dramática francesa, el realizador Emmanuel Mouret, vuelve participar na Sección Oficial Albar con Trois amies (Francia). El FICX cuntó col so llargumetraxe Las cosas que decimos, las cosas que hacemos en 2020 y cola presencia del cineasta na 60ª edición con Crónica de un amor efímero. Nesta ocasión Mouret narra la hestoria d'una muyer que tien de refaer la so vida en perdiendo al so home. El filme, que tuvo'l so estrenu na Sección Oficial del Festival de Venecia, cuenta coles magnífiques interpretaciones de Camille Cottin, Sara Forestier, India Hair y el siempres impecable Vincent Macaigne.

Nuevos talentos del cine se suman a la Sección Oficial Retueyos

A January 2 de Zsófia Szilágyi; Flathead de Jaydon Martin; Algo viejo, algo nuevo, algo prestado de Hernán Rosselli; Peaches Goes Bananas de Marie Losier; Fogo do vento de Marta Mateus; y Mother Vera de Cécile Embleton y Alys Tomlinson, súmense siete títulos de prometedores cineastes que componen una inmeyorable ufierta de programación na Sección Oficial Retueyos.

Itoiz udako sesioak (España) de Larraitz Zuazo, Zuri Goikoetxea y Ainhoa Andraka, revive la hestoria de la banda de rock progresivu / sinfónicu vasca Itoiz, que tres tener amplia reconocencia nos años 80, terminó por disolvese a finales d'esa década. El llargumetraxe formó parte d'un programa especial dientro de Cannes Doc que se desenvolvió en collaboración col FICX y ZINEBI y preséntase en Xixón en forma de premiere conxunta en collaboración col certame vascu.

El FICX cuntará cola estrena mundial de River Returns (Japón). Ye'l tercer llargumetraxe de Masakazu Kaneko, director qu'asitia nel centru de les sos hestories el venceyu del ser humanu cola naturaleza y que filma con una delicadeza escepcional. La película unvia al universu animáu de los Studios Ghibli en versión real.

El Festival va acoyer tamién la estrena mundial de Luna. El director asturianu Pablo Casanueva lleva a cabu, col so segundu llargumetraxe, un procesu d'investigación na memoria de la so familia que foi casi esterminada mientres la Guerra Civil y el franquismu topando la so hestoria «nes fronteres, los campos y les cárceles».

Yo vi tres luces negras (Colombia, Méxicu, Alemaña, Francia) ye'l segundu llargumetraxe de Santiago Lozano Álvarez. Nél, entra na selva colombiana p'acompañar nun ritu de pasaxe escontra la muerte a un home mayor que perdió al so fíu a manos de la milicia paramilitar. A la guapura del espaciu y la elección de los encuadres, súmase la espectacular fotografía al cargu de Juan Velásquez. La película llogró'l Premiu del Públicu na Sección Panorama de la Berlinale.

Sacha Amaral debuta con El placer es mío (Arxentina, Brasil, Francia), una ópera prima protagonizada por un magnéticu y problemáticu mozu que llogra aprovechase de quienquiera que s'encruza nel so camín. La película, que llogró'l Gran Premiu nel Festival Internacional de Buenos Aires (BAFICI), va tener la so premiere europea nel FICX.

La directora Elizabeth Lo, que ganó con Stray el Premiu a la Meyor Película na Sección Retueyos en 2020, vuelve competir nesta edición del FICX con Mistress Dispeller (China, EEXX). Nella, la cineasta ufierta una mirada a la China actual al traviés d'una nuevu oficiu surdíu cola puxanza d'internet: La ahuyentadora d'amantes.

Fuera de competición, el Festival proyectará'l mediometraxe What Mary Didn't Know (Grecia, Francia, Suecia), que tuvo la so estrena nel certame de Locarno y dirixida por Konstantina Kotzamani, dos vegaes nominada a los Premios del Cine Européu colos sos anteriores curtiumetraxes y que presentó Electric Swan nel FICX en 2019. Nesta ocasión la cineasta griega llévanos de cruceru pol Mediterráneu nun medley fabulosu ente Les Mil y una Nueches y la mitoloxía clásica, y failo dende la perspectiva d'una adolescente perdida a bordu d'esti viaxe al traviés del mar, la vida y les ensoñaciones.