El Centru Niemeyer inaugura la esposición «El ojo pródigo», del artista mierense Ángel Vergara

El Centru Niemeyer inaugura güei la esposición «El ojo pródigo», del artista asturianu Ángel Vergara, un percorríu per un conxuntu significativu d'obres nunca enantes amosaes a gran escala nel estáu y otres de creación específica pa esta amuesa, frutu del so trabayu con alumnos del Centru d'Educación Especial San Cristóbal y de diverses perfomances que tuvieron llugar na ciudá d'Avilés mientres les últimes selmanes.

Vergara ye unu de los creadores más importantes del panorama artísticu actual en Bélxica, prueba d'ello ye que foi escoyíu pa representar a esti país na edición del añu 2011 de la Bienal de Venecia. Precisamente nel marcu de la esposición El ojo pródigo podrá visitase una parte d'esa obra, Feuilleton, creada de manera reivindicativa ya irónica por Vergara pa titular el pabellón de los Giardini, qu'acoyó la so instalación Los siete pecaos capitales.

La esposición, comisariada por Ángel Varela, podrá visitase hasta'l 19 de xineru de 2025 nel Centru Niemeyer, dando cuenta d'una investigación artística qu'afonda en delles disciplines, toes elles fuertemente venceyaes a la pintura, el puntu de partida del xeniu creativu de Vergara. En «El ojo pródigo», entama les sos obres baxo la gran Cúpula que remembra un globu ocular, nuna disposición na que fai mesmo observaciones meditaes qu'espontánees, surdíes del azar, xenerando un doble sentíu o una imaxe inusual que convida, al nomalu, a la risa o a la reflexón.

Amás, Vergara, cautiváu pol universu de James Joyce, rínde-y tributu al so monumental Ulises, nel so vídeu And I said yes I will Yes apurriendo una mirada irónica y xagaz al centenariu percorríu de l'aclamada novela. Esta obra puede considerase una suerte d'homenaxe visual, un xuegu d'imaxes qu'emula la pallabra patente nes sos películes y acciones performátiques.

Tampoco podía faltar, Straatman, («l'home de la cai» en flamencu), l'alter ego col que Vergara cubre'l so cuerpu con una sábana blanca, pa reflexonar sobre la función creativa y les tensiones ente lo público y lo privao. Esti Straatman pinta, dibuxa, boceta, cautiváu pola percepción de les formes difuminadas, les conversaciones, los soníos, los golores, la lluz y les topografíes oscilantes de les ciudaes que visita: Hong Kong, Nueva York, París, Bruxeles, y agora Avilés. Ello ye que'l sábadu, 30 de payares, a les 18:00 hores, Straatman va intervenir la pieza númberu 19, nuna performance que va dexar al públicu asistente na Cúpula del Centru Niemeyer ser testigu del procesu creativu en vivu.