LABShop asoleya un adelantu de la programación de la edición d'avientu

LABshop, el mercáu d'arte y diseñu que se vien faciendo en Llaboral Centru d'Arte ende avientu de 2008, ta acabante de dar anuncia d'un adelantu de la edición viniente, que se va celebrar nel mes d'avientu. L'eventu axunta a un nutríu grupu de creadores, diseñadores y editores independientes. L'oxetivu d'esta actividá ye dar a conocer les actividaes rellacionaes col diseñu y la creación que se desenvuelven en Xixón y Asturies, mesmo qu'otres Comunidaes cercanes.

Ente les principales novedaes pa esta edición ta la estrena del espectáculu poéticu y musical «Ser quien a cantar» de l'artista Sofía Castañón. Sicasí, el platu fuerte d'esti adelantu ye'l conciertu que va dar el cantante xixoniegu Pablo Und Destruktion, un momentu que va ser mui especial. L'artista va repitir llugar d'actuación, depués de que tuviera nel mesmu eventu va xusto un añu.

Xunto al propiu mercáu, con creadores, diseñadores y editores independientes entá por confirmar, tan yá anunciaes la proyección d'una amuesa audiovisual d'Álex Galán y David Rodríguez, de Nunatak, que repiten nel LABShop, mesmo qu'un clásicu del eventu, como son les sesiones DJs. Nesti casu, la organización avanzó la presencia de La Viuda d'Angelín y la so cumbia psicodélica. Como yá ye vezu, el mercáu cuntará tamién con una serie de talleres, charres, proyecciones, presentaciones y música en directu y la yá tradicional zona gastro, con food trucks y bar.