Grau vistióse de gala y tradición nel Día'l traxe

Llana, lliñu, baille y muncha tradición. Eso foi lo que se vivió ayeri en Grau, onde un añu más se celebró'l Día'l traxe'l país, una cita cola tradición na que persones de tola comunidá vístense p'amosar la calidá de la so indumentaria. Nesta edición, que yera la octava, el xuráu taba formáu por Amadéu Benavente, Consuelu Riu, Constantino Menéndez y Héctor Díez y otorgaron estos premios:

Primer premiu categoría Home: Francisco Javier Cuesta Valdés

Primer premiu categoría Muyer: Maite Rozada Castañón

Segundu premiu categoría Home: Xulián Lopez Valdés

Segundu premiu categoría Muyer: Alicia Cañedo Álvarez

Tercer premiu categoría Home: Xesús Manteca Fraile

Tercer premiu categoría Muyer: Noelia Pérez Pérez.

Pela capital moscona pudieron vese traxes con mui bona calidá, anque nesta edición destacaron los traxes «de pudiente», ye dicir, traxes de mui bona calidá, con munchos abalorios y que se sacaben pa fiestes y bodes, principalmente. Ente les pieces que se pudieron ver destaquen dalgunes como la que vistía de Lluques Díez, una capa con muncha hestoria y anécdota. Trátase d'una pieza datada alredor de 1850-1860 y que l'agora propietariu mercó a Eusebio Prieto, descendiente del dueñu orixinal. Con ella, vistiérense'l so tataragüelu y el so bisgüelu nel so casoriu. Pertenecía a una familia pudiente de Viella, nel conceyu de Siero y foi fecha polos Vaqueiros de Torrestío, en Llión. Agora, con arguyu, vístela Lluques, una idea que quería'l so anterior dueñu, que la prenda tuviere vida y nun fuera un artículu de muséu.

Como esta, pudieron vese una montonera de pieces en Grau, una cita na que collabora'l Conceyu y que fai, a lo menos mientres un día, que la villa moscona seya la capital de la tradición asturiana. Tres el desfile y l'anuncia de los ganadores, la música y el baille del país enllenaron les cais del centru de Grau.