Viesques acueye la primer edición del Xixón Folk

Xixón acueye un festival folk más, gracies al trabayu de la banda de gaites Saxum. Sedrá esta fin de selmana nel parque fluvial de Viesques nunes xornaes donde música, artesanía, talleres y gastronomía van entemecese nunes xornaes de la celebración de la cultura tradicional d'Asturies. La programación inclúi una nueche en danza, nueche folk, taller de baille tradicional, pasucais, mercáu tradicional, talleres y actuaciones, ente otres actividaes.

La primer xornada, el vienres 27, va entamar cola apertura del mercáu y con dellos talleres artesanales, amás del soníu propiu de la música tradicional. A les 19.00 hores, Sergio Buelga, de la Compañía Asturiana de Comedias va ser l'encargáu de dar el pregón y, poco dempués, el grupu folklóricu Trebeyu va impartir una clase de baille tradicional. A les 21.00 hores va arrancar un desfile pel parque y, una hora dempués, unu de los momentos estrella del festival, cola nueche en danza na que van participar Trebeyu, Pandereteros d'Anguañu, Soi panderetera y la propia banda de gaites organizadora.

El sábadu, el mercáu va siguir abiertu, mesmo que los talleres, y habrá un alcuentru de bandes de gaites, con pasucais incluyíu. Sicasí, el momentu del día va ser la nueche folk, coles actuaciones de Aira da Pedra, dende El Bierzo y Corquiéu, nel que va ser el so segundu conciertu tres la vuelta a los escenarios. Yá de domingu, la sección de Coros y Danzas del Real Grupo de Cultura Covadonga va actuar nel festival a les 12.30 hores y a les 14.30 hores va dar empiezu la gran paellada na carpa del festival. Como piesllu, l'actuación de Rollu Folk a les 17.00 hores.