Los sindicatos llamen a axuntase nuna xornada histórica en defensa de Les 6 de La Suiza y el sindicalismu

Once organizaciones sindicales fixeron esti llunes un llamamientu a participar na manifestación convocada pal próximu sábadu en Xixón en solidaridá de los seis persones de Les 6 de La Suiza, que fueron condergaes a trés años y mediu de prisión por coacciones al propietariu d'una pastelería. Los convocantes de la manifestación, que tamién llama a la movilización «contra la criminalización del sindicalismu», son CCOO, UXT, USU, CGT, CNT, CSI, CT, ISA, RCT, SF y, SUATEA.

La manifestación va partir a les 12.00 hores de L'Humedal pa esixir la llibertá de Les 6 de La Suiza y pa defender los derechos sindicales, con lemes como «Toos somos les 6 de La Suiza» y «Les 6 de La Suiza nun pueden entrar en prisión». Tres rematar la manifestación, el Grupu de Sofitu de Les 6 de La Suiza entama una folixa solidaria, que, dende les 14.00 hores a les 22.00 hores, va desenvolvese na pista polideportiva de Cimavilla, con música en directu, mercáu solidariu, xuegos tradicionales pa la reciella y delles sorpreses más que la organización tien preparaes.

La manifestación del sábadu prodúzse pola resolución del casu xudicial de Les 6 de La Suiza. Les sentencies condenatories, que se publicaron va yá unos meses, suponíen trés años y mediu de carcel a caúna de les seis persones condenaes baxo’l pretestu de delitos d’obstrucción a la xusticia y coacciones graves. Una sentencia que les protagonistes ven como una conderga cola que dar exemplu y persiguir l’acción sindical y de la que resalten que «condergó a dos persones por dir a una xunta, a tres por solicitar esa xunta, a una por coyer un megáfonu nuna manifestación amás, de condenar a la trabayadora por cuntalo».