La SAnTINA Conference amplia plazu pa presentar propuestes sobre los estudios asturianos

La organización de la SAnTINA Conference, congresu científicu al rodiu de los estudios asturianos que se celebrará de manera totalmente virtual y de baldre mientres los díes 14 y 15 de payares, ta acabante de dar anuncia de l'ampliación de resúmenes. L'unviu de propuestes de presentación han tar rellacionaes col campu de los estudios asturianos, concebíu de manera amplia, como l’análisis de la llingua, la cultura y la hestoria d’Asturies y de los y les asturianes dende la perspectiva de les ciencies sociales y humanidaes. Les posibles exes temátiques inclúin la llingua, la llingüística, la lliteratura, el cine, la música, les artes visuales, la hestoria, l’activismu, la migración, los deportes, la industria, la salú y el mediu ambiente n’Asturies.

Los resúmenes y la información de los y les participantes han ser unviaos como archivu axuntu de Word o PDF a santina2024florida@gmail.com a más tardar el 5 de ochobre, 2024. Cada participante van poder proponer un máximu de dos resúmenes, unu individual y unu conxuntu. Les contribuciones tienen de tar escrites n’asturianu, castellanu o inglés, o una combinación d’estes llingües y les notificaciones d’aceptación van unviase a partir del 19 de ochobre de 2024.

Esta segunda conferencia SAnTINA va tar entamada pola Universidá de la Florida y la Universidá de la Florida Central, y organizada polos profesores Imanol Suárez-Palma (Universidá de la Florida) y Francisco Fernández-Rubiera (Universidá de la Florida Central).

Va tener llugar de manera virtual dafechu los díes 14 y 15 de payares de 2024. La inscripción ye de baldre mesmo pa ponentes que p’asistentes.

La conferencia SAnTINA 2024 coordínase en collaboración col grupu de trabayu Asturian Studies. Asturian Studies/SAnTINA ye una iniciativa académica dedicada a siguir desenvolviendo’l campu de los estudios asturianos y a esparder la cultura asturiana internacionalmente.