La periodista Marta Reyero, nomada Embaxadora de la Sidra d'Asturies Solidaria 2024

La Fundación Sandra Ibarra y el Conseyu Regulador de la Denominación d'Orixe Protexida Sidra d'Asturies nomaron a la periodista Marta Reyero Embaxadora de la Sidra d'Asturies Solidaria 2024. Esta reconocencia, de calter añal, sirve pa estremar el so llabor como difusora de la cultura y raigaños asturianos en tol territoriu nacional. D'esta manera, Reyero recueye'l testigu d'otru periodista asturianu, Antonio Lobato, premiáu na última edición.

Natural de Llión, Marta Reyero crióse n'Asturies. Llicenciada en Filosofía y Lletres, pola Universidá d'Uviéu, y en Ciencies de la Información, pola Universidá del País Vascu. La so carrera como periodista empecipió a finales de la década de los 80 en SER Xixón, Radio Asturies y Radio Minuto Asturies, emisores nes que yá empieza a espuntar. A empiezos de los 90 ingresa en TVE Asturies, antes de dar el pasu a Madrid.

Yá na capital d'España, Reyero empecipia'l so camín en programar Hora 25 y Hora 20, dambos de la Cadena SER. Dempués, sigue la so trayectoria en CNN+, enantes de recalar en Cuatro, onde trabaya dende entós. Na actualidá ye la presentadora de les dos ediciones d'informativos de la fin de selmana. Amás de la so carrera radiofónica y televisiva, Reyero publica artículos sobre cine y televisión n'El País y n'otres revistes especializaes.

Marta Reyero va recibir esta distinción el vienres 27 de setiembre a les 19:30 hores nel Llagar de Sidra Arbesú (Santa Marina, Siero), por cuenta de la tradicional Espicha Solidaria frente al cáncer, qu'anguaño cumple la so décima edición. Un añu más, la Fundación Sandra Ibarra y el Conseyu Regulador de la DOP Sidra d'Asturies entamen esti eventu que supón un homenaxe al espíritu solidariu asturianu.

Esta iniciativa tien como oxetivu sumar esfuerzos frente al cáncer, una y bones una parte de la recaldación va dir destinada a la Escuela de Vida de la Fundación Sandra Ibarra, una escuela de pacientes y supervivientes especializada n'afrontar les necesidaes asistenciales mientres el periodu de transición nel que nun hai tumor nin tratamientu, pero apaecen otres secueles. Ente les principales iniciatives destaca l'app ‘Escuela de Vida’, la primer aplicación móvil diseñada n'España pa brindar sofitu integral a los pacientes y supervivientes de cáncer, mesmo qu'a los sos familiares y cuidadores. Puede descargase de manera gratuita en Google Play y Apple Store.