La Facultá de Xeoloxía va acoyer el fondu documental y paleontolóxico d'Ignacio Patac y Pérez-Herce
Agora
La colección, con miles de fósiles y documentos bibliográficos, va treslladase de l'antigua Escuela de Mines a la facultá allugada nel Campus de Llamaquique
19 Sep 2024. Actualizado a las 05:00 h.
La Facultá de Xeoloxía de la Universidá d'Uviéu va acoyer el fondu documental y paleontolóxicu d'Ignacio Patac y Pérez-Herce, qu'hasta agora taba asitiáu na estinta Escuela de Mines d'Uviéu. El fondu ta integráu per miles de fósiles, fundamentalmente de paleobotánica, y miles de documentos bibliográficos. L'alcuerdu de cesión en depósitu del fondu foi suscritu güei por Ignacio Villaverde, rector de la Universidá d'Uviéu, y Ana Patac Regueru, nieta d'Ignacio Patac y Pérez-Herce.
L'oxetu d'alcuerdu ye caltener como un solu fondu la colección d'Ignacio Patac, de manera que puedan beneficiase d'él les xeneraciones vinientes. Con esti propósitu, la nieta de Patac, propietaria del fondu, cedió en depósitu, con calter indefiníu, a la Universidá d'Uviéu, institución que puede garantizar el caltenimientu de la colección nes meyores condiciones pa la so exhibición ya investigación. Antonio Luis Marqués Sierra, investigador del Departamentu d'Esplotación y Prospección de Mines de la universidá asturiana, foi escoyíu, en virtú del conveniu, como supervisor del correctu usu del fondu, amás d'interlocutor ente la institución académica y la familia.
La Universidá d'Uviéu va habilitar dos espacios pa esti fondu na Facultá de Xeoloxía. El Muséu de Xeoloxía de la institución académica va encargar de la so custodia, alministración y, nel so casu, esposición. Estos espacios, que van llevar el nome de Fondu Documental y Paleontolóxicu de D. Ignacio Patac y Pérez-Herce, van ser diseñaos pa dexar el correctu almacenamientu de documentos y amueses xeolóxiques, y van disponer de los medios necesarios pa la so afayadiza catalogación ya investigación.
El Muséu de Xeoloxía de la Universidá d'Uviéu va realizar un inventariu detalláu del fondu, mesmo que los llabores de custodia y caltenimientu y va alministrar l'accesu a la colección, facilitando'l so usu pa investigación y esposición. El fondu del inxenieru Ignacio Patac, fináu en 1967, taba asitiáu dende febreru de 2017 na antigua Escuela de Mines d'Uviéu.
Ignacio Patac y Pérez-Herce desenvolvió la mayor parte del so llabor profesional na minería del carbón y convirtióse nun destacáu especialista en paleontoloxía del Carboníferu. Dientro d'esta colección, son dos los grupos de fósiles carboníferos que merecen una especial atención, atendiendo a la calidá y cantidá d'exemplares: per una parte, los restos de flora (con representación de la totalidá de les cuenques carboníferes granibles españoles) y, por otra, los braquiópodos (invertebraos marinos bentónicos, esistentes güei día y especialmente abondosos mientres el Devónicu y el Carboníferu).