Mieres va acoyer la instalación audiovisual Alcove LTD

Dientro de la programación cultural del Conceyu de Mieres del últimu cuatrimestre de 2024, cargada de múltiples y diverses actividaes pa too tipu de públicos, el xueves viniente, 3 d'ochobre, va inaugurase nel Parque Aníbal Vázquez la instalación audiovisual Alcove LTD, realizada pol colectivu suizu Encor. L'amuesa d'esta pieza, impulsada pola Conceyalía de Cultura del Conceyu de Mieres, col comisariado de L.E.V. (Llaboratoriu d'Electrónica Visual) y el sofitu de la Fundación Suiza pa la Cultura Pro Helvetia, va convertir esti espaciu públicu de la ciudá nun llugar d'interacción y descubrimientu qu'apela directamente a los sos visitantes.

L'estudiu Encor, fundáu en 2016 polos artistes suizos Mirko Eremita, David Houncheringer, Valerio Spoletini y Manuel Oberholzer, utiliza un contenedor recicláu de seis metros como llenzu y oxetu de la instalación. Esti contenedor tresparente conviértee en Alcove LTD nuna caxa de lluces en movimientu, visible dende tolos ángulos, que capturaa los reflexos de los espectadores al traviés de películes de cristal líquidu, creando un engañagüeyos llumínicu y sonoru que cambia la so percepción. Tubos de lluz y fumu blanco inverten y animen l'interior nun xuegu de reflexos, desenfoques, contrastes y separaciones, pa crear una esperiencia inmersiva que nos convida a mirar pa dientro y modificar la manera na que reparamos la nuesa contorna.

Con esti proyectu, l'estudiu Encor busca cuestionar el conceutu d'aislamientu, reflexonar alredor de la mutación de los espacios y convidanos a mirar más allá de les apariencies, y facer dende la reutilización y aprovechamientu pa fines artísticos d'un oxetu refugáu, el contenedor de carga, allargando la so vida útil.

La pieza que se presenta en Mieres ye la nueva versión d'una primer obra del estudiu, presentada en Taiwán en 2020 nun espaciu zarráu. Tres ser reinterpretada na so esposición en Lyon, basándose nel calter tresportable del contenedor, la obra vuélvese nómada y ensin fronteres, dotándola d'un nuevu significáu que varia en función del espaciu nel que s'instala.