El Círculo Noega abre la so campaña d'abonaos percorriendo Xixón

La temporada de baloncestu en Xixón calienta motores cola apertura de la campaña d'abonaos del Círculo Gijón Noega Baloncesto, l'equipu de la ciudá que meyor asitiáu ta nes categoríes de la federación, yá que xuega en Tercera FEB. L'equipu xixoniegu dio entamu a la campaña va unos díes y reforzóla cola presentación del videu promocional, nel que, mientres casi dos minutos, dellos y delles integrantes de la plantiya del Círculo percuerren dalgunos de los sitios más emblemáticos de la villa xugando al baloncestu.

Esti añu, l'oxetivu del Círculo ye volver a la Segunda FEB, onde yá militó n'otres temporaes. Pa ello, l'equipu entrenáu por Nacho Galán afronta esta campaña con una plantiya remocicada y con cares nueves qu'aporten frescor a un equipu con ganes d'ésitu. Yoheri Hoexum, procedente del Baskonia, o Sergio Martínez, procedente de la Cultural Leonesa y con una estatura de 2,10 metros son dalgunos de los fichaxes qu'aporten esti añu a Xixón. A ellos, han sumase la continuidá na plantiya d'otros xugadores, como son Hugo Bartolomé o Samu Barros, ente otros.

La campaña d'abonaos presenta novedaes en comparanza con años anteriores. L'abonu pa los adultos tien un preciu de 54 euros, mientres que'l xuvenil (14 a 17 años) va costar diez euros y los más mozos van entrar al campu de baldre. La gran novedá ye l'abonu familiar, que cunta con dos abonos d'adultos, dos de xuveniles y, si hubiere infantiles, tamién entraríen dientro d'esti plan, qu'amás tien un preciu de 100 euros. Estos precios son los ufiertaos na web, que cunten con un 10% na web y que van caltenese hasta'l viniente 21 de setiembre, fecha na que ta prevista la presentación del equipu énte los aficionaos.