La Universidá d'Uviéu abre'l nuevu cursu académicu cola ambición de preparar a la institución pal futuru

Avanzar nel trabayu que s'empecipió va trés años cola ambición de preparar la Universidá d'Uviéu pal futuru. Ye'l mensaxe que quixo tresmitir Ignacio Villaverde, rector de la Universidá d'Uviéu, mientres la ceremonia d'apertura del cursu académicu 2024-2025. El máximu responsable de la institución académica sorrayó que'l filu conductor qu'empunxo la so xestión dende 2021 foi «l'enfotu y esmolición» del so equipu por que la universidá nun llegue tarde al sieglu XXI.

Villaverde, que fixo balance de la xestión del so equipu dende que se fixo cargu del gobiernu universitariu, destacó que la so máxima esmolición ye preparar la institución pa los vinientes años. «Tenemos que decidir ente toos qué universidá queremos ser, a ónde queremos dirixinos, col firme propósitu de mandar una universidá meyor a les xeneraciones vinientes, una universidá al altor del so tiempu», sorrayó'l rector.

El máximu responsable de la institución académica empezó la so intervención con un cariñosu agradecimientu a la figura del rector Juan Vázquez, presente na ceremonia, que, tres 48 años de serviciu, esti 31 d'agostu remató la so pertenencia alministrativa a la universidá. «Gracies rector pola to dedicación y el to legáu, vas siguir siendo una voz qu'ha ser ser escuchada», manifestó.

Serviciu públicu y conocencia

«Esta universidá escoyó ser futuru, escoyó ser un serviciu públicu aplicáu a xenerar conocimientu d'altu valir, tresmitilu y tresferi-yoslu a les futures xeneraciones. Escoyó mirar acullá y non encerrase nella mesma», fixo fincapié'l rector, nunes palabres pronunciaes n'asturianu. «Esta universidá escoyó ser entamadora y non una simple contratista del erariu públicu. Esta universidá escoyó ser axente de futuru y aventurera fuera de la so zona de confort, al aldu de los planes estratéxicos de nueso y del nuesu mapa d'especialización intelixente», añedió.

Villaverde, dirixiéndose al presidente del Principáu, indicó que, pa llevar la universidá al llugar que-y correspuende, la institución solo precisa tiempu y enfotu. «Tiempu por que los proyectos cuayen y dean resultaos, tiempu pa demostra-y a Asturies que somos la so meyor inversión», dixo.

Aumentu del estudiantáu

El rector señaló qu'un bon exemplu de que la universidá va pel bon camín ye la evolución de los datos de matrícula. «Anguaño, a primeros de setiembre de 2024, volvemos crecer en 200 estudiantes de grau, de los que más de 4.000 viven fuera d'Asturies, doblando casi la cifra del cursu anterior, como casi lo llogremos colos más de 1.400 estudiantes estranxeros matriculaos nos nuesos estudios». «Estes cifres falen de la nuesa reputación y de la nuesa competencia frente a la llegada a Asturies nos próximos años d'universidaes privaes», enfatizó. A estes altures del añu y col periodu de matriculación entá abiertu, son más de 20000 los estudiantes inscritos en títulos de grau, máster y doctoráu.

Villaverde avanzó qu'esti cursu 2024-2025, qu'agora empieza, tien de centrase en repensar «la nuesa estratexa». «La nuesa prioridá ye'l desenvolvimientu d'un nuevu modelu docente y d'ufierta formativa», indicó. «La Universidá d'Uviéu tien que reflexonar sobre qué quier ser como institución docente, sobro cómo queremos enseñar y cómo quier el nuesu estudiantáu que los enseñemos». Tamién manifestó que mientres esti añu la institución que dirixe tien de desenvolver el mapa d'especialización intelixente y afondar nos sos hubs y rematar la nueva estructura alministrativa desenvolviendo les alministraciones de campus. Desveló amás el rector que se van crear nueves unidaes alministratives, como les d'informática, sofitu a la investigación y comunicación y marketing, y que se va reestructurar el serviciu de biblioteca pa formalizar los nuevos servicios de sofitu a la investigación y la unidá d'analís de datos, y va profesionalizase les direcciones del serviciu d'informática y de prevención y riesgos llaborales. Comprometióse igualmente a siguir lo que definió como «batalla interminable» contra la burocracia y el papeléu pa lo que se va poner en marcha un plan de choque allixerando procedimientos y asignando les xeres alministratives de forma clara y precisa pa que cada cual faiga lo que-y correspuende.