La UP de Xixón celebra un cursu sobre los 50 años de Conceyu Bable

Esti añu cúmplese mediu sieglu del nacimientu de Conceyu Bable, un colectivu promovíu por tres profesores mozos qu’en 1974 ficieron un llamamientu, nuna entrevista na revista Asturias Semanal, pa defender la llingua y la cultura asturianes: Xosé Lluis García Arias, Xuan Xosé Sánchez Vicente y Lluis Xabel Álvarez. La conseña ¡Puxa Asturies!, la campaña Bable nes escueles, la popularización de la bandera d’Asturies, el sofitu a la música y a la lliteratura n’asturianu, a la etnografía y a los deportes tradicionales, fueron señes d’identidá d’esta asociación, que s’estructuró a traviés de conceyos locales en Xixón, Uviéu, Avilés, Llangréu, Mieres, Urbiés…

Pa facer alcordanza d'esa asociación, la Universidá Popular de Xixón ta acabante de sacar un cursu sobre asociación Conceyu Bable, con delles actividaes p'afondar na so hestoria. Nesti cursu, que va cuntar col testimoniu en primer persona de miembros de Conceyu Bable, va analizase la hestoria d’esi movimientu y la influencia que tuvo en fenómenos como’l Nuevu Canciu Astur o’l Surdimientu lliterariu y en fechos como la creación de l’Academia de la Llingua Asturiana. Conceyu Bable: cincuenta años semando, va celebrase los martes y xueves de 19.30 a 21.00 hores nel CMI El Llano dende'l 15 d'ochobre. La inscripción al cursu pue facese dende'l 13 de setiembre.

Amás, tamién habra momentu pa les recetes, con un taller de cocina nel que les recetes asturianes serán protagonistes y onde amás podremos conocer la hestoria d’esti conceyu que revolucionó la sociedá asturiana reivindicando con arguyu la llingua asturiana, asina como los elementos identitarios d’Asturies. Conceyu Bable espublizaba recetes na revista Asturies Semanal, nun yeren afayadices pa cocinar (gaviota asada o blancu a la plancha… ) pero sí pa servir de filu conductor pa esti taller col que se quier reconocer y agradecer la llabor d’esti colectivu.