El documentu fundacional del Monesteriu de San Salvador de Corniana vuelve a Asturies pa esponese

Nel añu 1024 firmóse’l pergamín que contién la dotación fundacional del Monesteriu de San Salvador de Corniana. Un documentu milenariu que resulta trescendental pa conocer los oríxenes del complexu monásticu y que, procedente del Archivu Históricu Nacional, agora vuelve a Asturies, onde va tar espuestu una selmana: el sábadu 16 de payares va facelo nel mesmu Monesteriu, nel conceyu de Salas, y hasta’l vienres 22 de payares nel Archivu Históricu d’Asturies, allugáu n’Uviéu.

El documentu al traviés del que se constata la fundación del Monesteriu, na actualidá dedicáu a San Salvador, ye propiedá del Archivu Históricu Nacional, archivu estatal dependiente del Ministeriu de Cultura, qu’atendió’l pidimientu del Gobiernu d’Asturies p’averar esti escritu tan importante a la ciudadanía asturiano. Una collaboración frutu del diálogu ente alministraciones que s’enmarca dientro de los programes del Ministeriu de Cultura p’averar los documentos históricos a los sos llugares d’orixe.

La conmemoración del milenariu d’esti cenobiu tan impresionante, que coincide nel tiempu con obres importantes de rehabilitación del monesteriu, yá dio pie a una programación importante d’actividaes: conferencies, espectáculos d’artes escéniques, música, lliteratura y difusión del patrimoniu. A toes estes iniciatives del Executivu autonómicu súmase la collaboración de la Conseyería de Cultura pal impulsu d’un proyectu d’investigación sobre la etapa medieval del complexu monásticu que se materializó nel llibru de Miguel Calleja-Puerta El monasterio de San Salvador de Cornellana en la Edad Media (1024-1536).

El documentu milenariu

El 31 de mayu del añu 1024 un pergamín ?yá milenariu? recoyó la dotación fundacional d’un monesteriu nel territoriu de Salas, nel llugar de Corniana. Fundábalu cierta doña Cristina, que yera fía del rei Vermudo II y de la reina Velasquita. Y con aquel actu solemne empezó la historia d’una institución onde la vida monástica allargóse hasta’l sieglu XIX, y que foi protagonista fundamental de la historia del valle del Narcea a lo llargo de los postreros mil años.

Más allá del so interés pa la historia local y la so cronoloxía milenaria, el documentu de dotación sobresal pola tipoloxía, porque la dotación del monesteriu ye una acción xurídica poco frecuente nesa dómina; destaca igualmente la so redacción curiada, la so escritura solemne y les sos dimensiones llamatives, nun pergamín orixinal que recoyía privilexos importantes al tiempu de fundase’l monesteriu.

El documentu milenariu que se va esponer n’Asturies ye un exemplu claru del valor de los archivos pa la recuperación de la memoria histórica. Les evidencies axuntaes amuesen que la memoria de la fundación de doña Cristina en Corniana se perdió en dómina temprana: a últimos del sieglu XII, ún de los sos descendientes axuntó tou aquel heriedu y donólu a l’abadía de Cluny, que n’adelantre recordóse como fundador. Hubo qu’esperar a primeros del sieglu XVII pa que los eruditos de la Congregación de Valladolid recuperaren la memoria de la infanta al traviés del archivu.

Les investigaciones de más recién punxeron de relieve’l grau tan altu d’autonomía y capacidá d’acción que podíen tener a primeros del sieglu XI les muyeres de la realeza, contribuyendo asina a la xeneración de conocencia histórica nueva susceptible d’impactu social nel nuestru tiempu.

Esposición y ciclu de conferencies

Por cuenta de la venida del pergamín milenariu a Asturies, va abrir una esposición documental nel Archivu Históricu d’Asturies comisariada pol profesor Miguel Calleja Puerta que se va inaugurar el 17 de payares. Nesta amuesa, amás del testamentu fundacional, van enseñase otros documentos y facsímiles rellacionaos cola historia del monesteriu, que muestren un repertoriu documental completu de la so historia tan llarga.

Tamién va haber tiempu pa un ciclu de conferencies divulgatives al traviés del Muséu Arqueolóxicu d’Asturies que se van celebrar nel mesmu cenobiu nos meses de setiembre, ochobre y payares d’esti 2024. Nestes xornaes va tratase la historia, la documentación y el patrimoniu cultural xeneraos por estos mil años d’historia monástica a les orielles del ríu Narcea.