Iniciativa pol Asturianu denuncia que'l concursu de novela curtia de Terror y Histories Fantástiques de Nava nun almite obres n'asturianu

El concursu lliterariu de novela curtia de Terror y Histories Fantástiques de Nava discrimina a los y les escritores n’asturianu, denuncia l'asociación Iniciativa pol Asturianu. El Conceyu espublizó a mediaos d’agostu les bases reguladores de la sesta convocatoria del premiu que solo almite la presentación d’obres escrites en castellán. Por mor d’ello, Iniciativa pol Asturianu reclamó hai unes selmanes al consistoriu navetu la modificación de les normes reguladores del concursu pa permitir la participación d’obres escrites en llingua asturiana, independientemente de que tamién se puedan presentar otres escrites en castellán.

La organización de reivindicación llingüística considera qu’esta decisión permitiría que l’asturianu tuviese presente con normalidá na convocatoria. Amás, contribuyiría a visibilizar l’idioma y aumentar el númberu de participantes al concursu. Nesi sen, la entidá recuerda que nos últimos tiempos hai un crecimientu mui grande de la creación lliteraria en llingua asturiana nel xéneru de la novela negra y de la fantasía. D’esta manera, esti gallardón podría convertise nun escaparate mui interesante pa promocionar y da-yos difusión a tolos escritores nel idioma propiu y a les sos obres.

Iniciativa pol Asturianu afala al Conceyu de Nava a dar un pasu alantre na normalización social del asturianu incluyendo la llingua asturiana na convocatoria d’esti premiu. Esta decisión permitiría amás acercar a los llectores más mozos, polo xeneral consumidores d'esti xéneru fantásticu y de mieu, diferentes obres escrites n’asturianu.