Pablo Castrillo encumbra al Kern Pharma en Cuitu Nigru
Agora
L'aragonés consiguió la so segunda victoria d'etapa, que ye tamién la segunda de la escuadra farmacéutica
02 Sep 2024. Actualizado a las 12:00 h.
Si hai daquién que tea faciendo hestoria nesta edición de La Vuelta, ensin contar a los favoritos a la victoria final, esi ye Pablo Castrillo. L'aragonés consiguió ayeri na primer etapa con final n'Asturies una victoria de les que dexen posu y de les que se fala mientres munchu tiempu, non solo por ganar na durísima meta de Cuitu Nigru, sinon tamién por ganar a los rivales escontra los que lluchaba: Pavel Sivakov (UAE Emirates Team) y Aleksandr Vlasov (Red Bull - BORA Hansgrohe), pertenecientes a dos de los equipos del pelotón con más presupuestu.
La etapa echaba andar en L'Infiestu y, magar de ser una etapa curtia, el día diba ser de fazañes históriques. Enantes de la segunda xubida a la Col.ladiel.la, la cabeza del grupu cuntaba con casi dos minutos de ventaya. 21 corredores formaben la fuga del día, onde había xente importante como Bennett y Sivakov (UAE Emirates Team), ciclistes de los equipos importantes de la xeneral como Decathlon AG2R La Mondiale (Armirail y Paret-Peintre), Visma - Lease a Bike (Kruijswijk), Red Bull - BORA Hansgrohe (Daniel Felipe y Vlasov), Movistar (Oier Lazkano) y por detrás tiraben los homes del T-Rex de Mikel Landa, que diba cola mecha preparada pa facer españar la carrera.
La fuga diba perdiendo pretendientes según pasaben los quilómetros y na xubida de Payares namás quedaben trés homes: Vlasov, Sivakov y l'héroe del día, Pablo Castrillo. Mientres tanto, Primoz Roglic facía un cambéu de bicicleta nun plan p'asaltar el maillot encarnáu. A siete quilómetros pal final, Landa activaba la batalla, a poques de rematar la xubida de Payares pa encarar el Cuitu Nigru. A trés quilómetros, Castrillo llanzóse a pola victoria, rematando al rusu Vlasov hasta en dos vegaes y pudiendo llevantar los brazos con rabia no cimero de Valgrande-Payares.
Na xeneral, Roglic intentó sacar tiempu a los sos rivales y l'únicu que lu supo aguantar foi Enric Mas, aportando a meta xuntos. El líder O'Connor volvió perder tiempu, pero menos de lo que s'esperaba y sigue col maillot enfundáu. Güei, xornada de descansu en tierres asturianes y mañana, traca final n'Asturies con meta nos Llagos de Cuadonga. La Vuelta decídese n'Asturies.