Iniciativa pol Asturianu denuncia que'l Conceyu d'Uviéu incumple la toponimia oficial na señalética de la rotonda nueva de Santuyano

La señalética de la rotonda nueva de Santuyano incumple la toponimia oficial asturiana, asina lo denuncia la organización Iniciativa pol Asturianu. La cartelería instalada pol Conceyu d’Uviéu na infraestructura que xune los barrios de Ventanielles y Teatinos inora la forma tradicional y oficial Xixón. Unu de los lletreros recueye namás la forma de ‘Gijón’ en contraposición col Decretu 105/2006, de 20 de setiembre, pol que se determinen los topónimos oficiales del Conceyu de Xixón, qu’afita claramente que’l nome oficial de la ciudá ye Gijón/Xixón.

Nesi sen, Iniciativa pol Asturianu ta acabante de rexistrar una reclamación al Conceyu afalando al equipu de gobiernu de la capital a facer usu de la toponimia oficial na cartelería y tamién de la llingua asturiana. La organización de reivindicación llingüística considera que la presencia del asturianu, de la toponimia oficial y l’usu bilingüe (centru ciudá, por exemplu) nos paneles nun tendría costu pal conceyu, siendo esti un mou de visibilizar y normalizar la llingua asturiana.

Na reclamación presentada al Conceyu d’Uviéu, la entidá invita tamién al gobiernu municipal a caltener un compromisu con la normalización y de cumplimientu de la Llei d’Usu y Promoción del asturianu tal como defiende’l Partíu Popular d’Asturies.