21 espectáculos de teatru, música, títeres y danza pa esfrutar na séptima edición de Rincones y Recovecos

Rincones y Recovecos, el Festival d'Artes Escéniques n'Espaciu Singular, propón al públicu na so séptima edición 21 producciones de teatru, música, títeres, cine y danza en percorríos narrativos, circuitos artísticos, actividaes gratuites n'asturianu y una cuidada programación pa tolos públicos qu'anguaño se celebrará del 12 al 14 de setiembre en Llaboral Ciudá de la Cultura, y que les sos entraes tán a la venta dende güei. La séptima edición va ufiertar programación diurna y nocherniega n'espacios escénicos poco convencionales, reivindicando asina la singularidá d'unu de los pocos certames d'artes escéniques privaos que se desenvuelven n'Asturies.

La séptima entrega de Rincones y Recovecos va ufiertar al públicu trés estrenos absolutos, dos preestrenos, espectáculos qu'inclúin consumición, actuaciones gratuites y xuegos artesanos. En total, trenta y cuatro cites artístiques qu'anguaño van tener llugar en 16 espacios de Llaboral Ciudá de la Cultura, dellos rincones yá conocíos del públicu del festival como la plaza, la caxa escénica del teatru o les cocines, y otros nuevos, como llavanderíes, el PatiOh! o la cafetería.

Rincones y Recovecos va acoyer los estrenos absolutos de les compañíes asturianes Factoría Norte (Dormiyosos), Mago Nacho (Imagínate Mago Nacho) y Soy Semilla (Quien a buen árbol se arrima). Proyecto Piloto va ufiertar el pre-estrenu de Bhaus, y Mapi Quintana, adelanta Working Class. A les compañíes asturianes mentaes, súmense nesta edición Teatro del Cuervo (El teatro más pequeño del mundo); La Roca Producciones (Zozobra) y Los Pintores (Los pañales del ratón) y l'alumnáu de la Escuela Superior d'Arte Dramáticu d'Asturies, dirixíos por Luisa Aguilar, que va ufiertar El objeto vivo.

El cartelu inclúi tamién a la compañía rioxana Realidad Traviesa, que va inaugurar el festival el 12 de setiembre con Tiempos ancestrales; les navarres T-Diferencia (El cabaré de Colette), Yarleku Teatro (el so espectáculu By y Bu llega al festival en collaboración con Camino Escena Norte) y Pájaros Pintados (El jardín de Olivia); los madrilanos Factoría Teatro (Novelas ejemplares), Cristina Bernal (que va clausurar el festival con La bernalina) y Eugenia Manzaneda (Ábrete libro y Cuentos gallináneos); los cántabros Ábrego Producciones (Lear en las catedrales) y los andaluces Bric a Brac (Quijote nómada). Rincones y Recovecos sigue espandiendo la so cartelera fuera del estáu. L'apuesta internacional enfoca les artes escéniques americanes, cola compañía mexicana MondomEraki, que va facer doblete colos espectáculos Cuentos con café y Frida.