Libros del Norte, la llibrería de segunda mano que trunfa dende'l rural asturianu

Que los llibros bien merecen más d'una llectura ye dalgo qu'Andrea Sierra y Cesar Maceda tuvieron claro cuando nel añu 2021 dedicieron emprender una aventura que va más allá de los llibros. La pareya, residente en La Ribera, ye una apasionada de la lliteratura magar de venir de dos mundos estremaos como son l'arqueoloxía y el diseñu gráficu.

César guardaba en casa una montonera de llibros y lo que podía ser un problema de pareya pol enorme volume acabó nun emprendimientu empresarial que fai que, agora mesmo, seya la mayor llibrería de segunda mano, con más de 7.000 títulos disponibles na so páxina web. Tanto ye asina que, va unes selmanes, el proyectu siguió'l so camín agrandando l'espaciu d'almacenaxe de tan bayurosa lliteratura col envís de poder tener más cantidá, pero tamién de poder visitar esi llugar onde'l saber nun ocupa llugar.

El so catálogu ye de lo más amplio. Dende llibros convencionales pasando per primeres ediciones, llibros descatalogaos o ediciones firmaes, la so colección a al venta faise con donaciones y compres feches con procuru pa poder llograr una bona selección. Y como saben que los llibros han cuidase, anque seyan de segunda mano, los xóvenes emprendedores cunten tamién con dellos complementos, como fundes pa les obres o marcapáxines, ente otros.

Andrea y César teníen claro que la lliteratura y los llibros podíen tener una segunda (y tercera, y cuarta...) vida. Y fixeron realidá esi pensamientu. Como amás tán concenciaos col cuidu del medioambiente, amás d'empaquetar los exemplares con material reciclao, la pareya procura facer la entrega en persona, amenorgando asina la buelga medioambiental. Una amuesa más de que se puede facer cultura y emprender dende'l rural asturianu.