Asturies foi la comunidá con más crecimientu nel númberu d'empreses

Asturies foi la comunidá na que más aumentó la creación d'empreses nel primer trimestre del añu, con un crecimientu del 13,36% en comparanza col mesmu periodu de 2023 y mui per enriba de la media estatal.

Según les cifres daes pol Institutu Nacional d'Estadística (INE), n'Asturies creáronse 840 empreses ente xineru y xunu, lo qu'equival a una media de daqué más de cuatro per día. Esti númberu representa 99 compañíes más que les constituyíes nel primer semestre de 2023. Amás, trátase de la cifra más alta rexistrada nos postreros ocho años, esto ye, dende'l primer semestre de 2016.

Les estadístiques demuestren el notable dinamismu empresarial de la comunidá, ensin que nenguna otra s'avere al crecimientu d'Asturies. Solo Galicia (10,24%) y Cantabria (9,47%) tan cerca del porcentaxe alcanzao por Asturies, toes elles na cornisa cantábrica. El porcentaxe d'Asturies ye significativamente superior a la media estatal, que foi del 3,84%.

Los datos coinciden colos publicaos apocayá pel Centru d'Información Estadística del Notariado, que señala a Asturies como una de les comunidaes nes que más creció la constitución d'empreses nos primeres seis meses del añu. Les cifres tamién son similares a les revelaes va unos díes pola consultora Informa D&B nel so estudiu sobre demografía empresarial.

Esti últimu documentu ye muncho más detalláu y dexa analizar los sectores d'actividá nos que la creación d'empreses esperimentó un mayor crecimientu. Nel acumuláu hasta xunu, l'informe cita la construcción y les actividaes inmobiliaries como'l sector que más compañíes sumó, con 186 nueves. Síguen-y la hostelería, con 161 empreses, favorecida pola bona campaña turística, y les empreses qu'empresten servicios a otres empreses, con 116 nueves firmes. Tamién destaquen los datos de la industria, con 49 nueves empreses creaes.