Natalia Pastor gana'l VII Premiu Muséu Barjola con «Barricada doméstica, de dentro a afuera»

El proyectu de l'artista asturiana Natalia Pastor, Barricada doméstica, de dentro a fuera, ganó la séptima edición del Premio Muséu Barjola d'artes plástiques. Esti galardón que convoca la Conseyería de Cultura, Política Llingüística y Deporte concédese al meyor proyectu espositivu creáu específicamente para la capiya de la Trinidá, del Muséu Barjola de Xixón.

El xuráu, presidíu pol director xeneral de Patrimoniu Cultural, Pablo León, alcordó por unanimidá conceder esta reconocencia a la propuesta de Natalia Pastor, un proyectu de calter instalativu multidisciplinar que sigue una llinia de trabayu mui coherente de la creadora y que ta articuláu al rodiu d'aspectos como la llucha obrera, la interiorización del paisaxe de la cuenca minera del Nalón y l'espaciu domésticu, nel que conflúin los roles de muyer trabayadora, de madre y d'artista. Pastor trabaya tamién con conceptos como'l feminismu y la identidá colectiva y minera. D'esta forma, propón una historiografía de la cuenca del Nalón en formatu instalativu que s'adapta a la capiella de la Trinidá.

Natalia Pastor (La Pola Llaviana, 1970) ye llicenciada n'Audiovisuales y Pintura pola Universidá del País Vascu. Artista de llarga y reconocida trayectoria, dende 1999 desenvolvió esposiciones individuales y tamién participó n'amueses colectives. Llogró premios como'l d'Artista Moza Relevación n'Asturies (2001), el VII Premiu de Pintura de la Xunta Xeneral del Principáu d'Asturies (2007) y el XL Certame Nacional d'Arte de L.luarca (2009).

La so obra ta fondamente marcada pol llugar nel que vive, la cuenca minera del Nalón. Nos sos proyectos artísticos conflúin el paisaxe físicu y el psicolóxicu, que converxen, dende planteamientos formales distintos, nuna visión del territoriu que bailla ente'l testimoniu, el documentu, la mirada idealizada y lo épico.