Los graos de Criminoloxía y Ciencies de l'Actividá Física y del Deporte yá son una realidá

El Conseyu de Gobiernu asturianu aprobó la implantación de dos nuevos graos na Universidá d'Uviéu: Criminoloxía y Ciencies de l'Actividá Física y del Deporte. Dambes titulaciones van empezar a impartise'l próximu cursu, con un máximu de 60 places de nuevu ingresu en caúna.

El grau de Criminoloxía va tar adscritu a la Facultá de Derechu, mientres que'l de Ciencies de l'Actividá Física va depender de la Facultá de Formación del Profesoráu y Educación. En xunto, les dos titulaciones van tener un costu global de 5,5 millones hasta la so completa implantación, nel cursu 2027-2028.

Les propuestes d'implantación cunten col vistu bonu del conseyu de gobiernu y del conseyu social de la institución académica, mesmo que'l resolvimientu positivu de la Comisión de Verificación y Acreditación de Planes d'Estudios del Conseyu d'Universidaes. La Dirección Xeneral d'Universidá d'Asturies, pela so parte, tamién emitió'l preceptivu informe previu sobre la necesidá y viabilidá económica y social de les dos nueves titulaciones.