Songs for an Ewan Day apuesta un añu más pola música emerxente

Songs for an Ewan Day volverá facer maxa na viesca del Agüil en Salinas (Castrillón, Asturies) el 9 y 10 d'agostu, que va ser cuando esti festival celebre la so IX edición. La cita volverá xunir música, deporte y gastronomía pa ufiertar al públicu mientres la fin de selmana un increíble plan al aire llibre que podrá volvese a esfrutar de baldre.

Como ye habitual, Songs for an Ewan Day volverá enfotase na cita, cuidando cada detalle y apostando por dar protagonismu a talentos emerxentes, seña d'identidá del festival, nun cartelu que van compartir con artistes y bandes yá consolidaes.

El senderu que se dibuxa ente los árboles de la viesca va conducir al íntimu escenariu, integráu na selvaxe naturaleza del llugar, pol que van pasar David Otero, Marina Reche, Noan, Lemot, Hinds, Smile, Mafalda Cardenal, Yarea, Inazio y un artista convidáu sorpresa, que va ser el colofón d'esta nueva edición. Toos xuntos van ufiertar dos nueches inolvidables nes que, un añu más, va tar presente Vibra Mahou, la plataforma de música de Mahou Cinco Estrellas que promueve los alcuentros al rodiu del directu, amosando'l so fiel compromisu con Asturies y la música. El festival va cuntar con una zona de food trucks na que los asistentes van atopar propuestes pa tolos gustos, ideales pa reponer fuerces a lo llargo de la xornada musical.

Songs for an Ewan Day va poner el ramu al cartel con dos planes pa la mañana del sábadu: la mesma viesca va ser l'escenariu d'una esclusiva clase de yoga con Betty Ewan mientres que na sablera va haber una sesión de paddlesurf cola deportista vasca Alazne Aurrekoetxea (surfista profesional, Campeona d'Europa y Campeona del Mundu por Equipos). L'accesu a estes dos actividaes va ser al traviés de sortéu tantu nes redes de les instructores como nes del festival, onde tamién va colgase tola información.