El Muséu Etnográficu Pepe'l Ferreiro inaugura l'amuesa Cuntando los 40

El Muséu Etnográficu de Grandas de Salime Pepe'l Ferreiro abre al públicu l'amuesa. Esta amuesa audiovisual y fotográfica enseña hasta'l próximu 31 d'ochobre cómo foi creciendo'l centru museísticu dende la so fundación en 1984, repasando la so evolución nestes cuatro décades. Pa conocer fonderamente la trayectoria del Muséu, va haber visites guiaes a esta amuesa tolos xueves del 1 d'agostu hasta'l 17 d'ochobre (sacante'l 15 d'agostu).

Esta selmana empezaron amás les demostraciones d'oficios tradicionales: Arturo Iglesias, el torneiro del Muséu, amuesa al públicu'l funcionamientu del tornu de media vuelta los martes y xueves hasta'l 12 de setiembre; y hai demostraciones de forxa, unu de los oficios con mayor demanda nes comunidaes llabradores tradicionales, los miércoles y vienres hasta'l 13 de setiembre.

La Dirección Xeneral de Retu Demográficu del Principáu d'Asturies, la Fundación Parque Históricu del Navia, Saltos del Navia y el mesmu Muséu entamen una xornada especial esti sábadu 27 de xunetu centrada nel patrimoniu industrial de la contorna. L'actividá va empezar a les 11.00 hores cola presentación del catálogu Paisaxes da industria de la Fundación Parque Históricu del Navia nel Muséu, va siguir con una visita guiada a la central del Saltu de Salime a les 12:30 hores y va terminar con una visita guiada al pobláu d'A Paicega en Pezós a les 14.00 hores, onde va haber una degustación gastronómica de productos de la zona