La tradición y el folk vívense en Somiedo

Ente'l 28 de xunu y el 1 de xunetu, la Pola de Somiedo foi l'escenariu de la primer edición del Llar Trad Fest, una celebración de la música, danza y cultura tradicionales. Entamáu pola Asociación Cultural Llar Folk, cola collaboración del Conceyu somedanu, y nun enclave incomparable como’l Parque Natural de Somiedo, cuna de los vaqueiros d'alzada, esti festival atraxo a cientos de visitantes que se somorguiaron nuna xuntanza única, enllena d'hestoria, tradición ya intercambiu cultural.

El festival entamó’l 28 de xunu con un taller d’escanciáu de sidra, pa dir abriendo boca a los visitantes. Depués, dió aniciu la ceremonia d'inauguración qu'axuntó a llocales y visitantes nel Mercáu de Ganáu de la Pola. L'alcalde, acompañáu d’Antón García, responsable d'Acción Cultural y Normalización Llingüística na Viceconseyería de Cultura, Política Llingüística y Deportes, y Bree Delian, directora del festival, dieron la bienllegada a les y los asistentes. Darréu entamó la primera xornada de conciertos na que se pudo esfrutar de Gonzalo Llao, Julio Rodríguez, Anxo Lorenzo, Luis Nicolás, Jesús Enrique 'Chuchi' y los asturianos Felpeyu.

Magar del 29 de xunu, el Llar Trad Fest enfocóse entá más na participación activa del públicu. Dende primeres hores de la mañana y mientres los tres díes de festival, los asistentes introduciéronse na cultura y música tradicionales de la mano de Xosé Antón 'Ambás' y Ramsés Ilesies, coles sesiones Ritmu y cantares. Darréu l’alumnáu repartíase peles distintes ubicaciones de La Pola pa dar entamu a les estremaes clases maxistrales adaptaes a tolos niveles. El festival cuntó con 30 profesores de seis países, que compartieron les sos conocencies en diez especialidaes musicales: guitarra/bouzouki, vigulín, xiblata, whistle, gaita, percusión, bodhran, acordión, cantu y baille tradicional y pandereta. Amás cuntó con un programa pa la reciella destináu a avivar la pasión pola música y la cultura tradicional y col envís, amás, d’ayudar a la conciliación familiar mientres l'eventu.

Ente'l profesoráu alcontrábense nomes internacionales como Michael McGoldrick (Reinu Xuníu/Irlanda), Jean-Michel Veillon (Bretaña), Josephine Marsh (Irlanda), Simon Bradley (Escocia), Fin Moore (Escocia), vecinos como Anxo Lorenzo (Galiza), Xisco Feijoó (Galiza) o Cris Zagaleja (Castiella) o los asturianos Pepín de Muñalén, Borja Baragaño, Lisardo Prieto, Xel Pereda, Pau Santirso, David Varela, Ruma Barbero, ente otros. La nueche del sábadu los ritmos pal baille foron los protagonistes, nuna Nueche en Danza na que participaron, ente otros, Xosé Antón 'Ambás', Ramsés Ilesies, Cris Zagaleja, Picarós, Santi Galguera, Xuacu Amieva o Marie Le Goff y Alexandre Romieux o’l grupu Herbamora.

El domingu los conciertos continuaron con una xuntanza d’intérpretes internacionales y asturianos na que se vieron colaboraciones como la de Jean-Michel Veillon y Xel Pereda, Josephine Marsh, Liz Doherty y Alberto Ablanedo, Xisco Feijoo y Sandriña Costa, Simon Bradley, Borja Baragaño y Julio Rodríguez.

El llunes los asturianos Felpeyu volvieron xubir a les escenariu de Llar Trad pa poner el ramu al festival, esta vez acompañaos pol propiu alumnáu, Finn Moore, Anna-Wendy Stevenson y Gonzalo Llao, Michael McGoldrick y Luis Nicolás. Mientres les cuatro nueches y tres díes de programación la formación complementóse con slow sessions onde profesionales y aficionaos pudieron compartir la so música, charres y meses redondes al rodiu de la cultura celta y sesiones improvisaes en dellos requexos del valle somedanu. Llar Trad Fest foi una celebración que, ensin dulda, va siguir creciendo y atrayendo a más persones n'años vinientes, calteniendo vivu’l llar de la cultura asturiana.