El Muséu del Pueblu d'Asturies recibe la donación del Archivu de Música Tradicional de Fernando Ornosa

El Muséu del Pueblu d’Asturies recibió de Fernando Ornosa la donación de tolos materiales del Archivu de Música Tradicional, qu'esti investigador lleva guardando dende 2001. Los materiales vienen de un trabayu de campu con grabaciones audiovisuales orixinales de testimonios musicales y orales recoyíos en distintos llugares d'Asturies. A ello súmense les cesiones realizaes per parte de 93 investigadores y asociaciones culturales venceyaes a la recoyida d'estos testimonios, ente los que destaquen los materiales apurríos pol Centru Etnográficu Joaquín Díaz, d'Urueña (Valladolid), y l'archivu d'Alan Lomax, de Nueva York; les grabaciones d'actuaciones de grupos de música y folclor, conferencies, etc.

El resultáu ye un archivu qu'axunta numberosos fondos del patrimoniu cultural inmaterial, como cantares, bailles, pieces instrumentales, cuentos, lleendes, romances, toponimia, testimonios orales, memories de vida y tolo que tien que ver cola música popular y tradicional d'Asturies. Con esta donación garantízase la custodia y caltenimientu dende una institución pública d'esti patrimoniu cultural inmaterial, y algámase'l marcu llegal que va dexar l'análisis, l'estudiu y la divulgación d'estos fondos atropaos ente 2001 y l'actualidá.

Unu de los primeros oxetivos del Muséu del Pueblu d’Asturies con esta donación ye la publicación d'un fondu sonoru online, con grabaciones editaes d'esti archivu. Pa ello, incorporóse al repositorio d'activos dixitales del Conceyu de Xixón, que yá contien fondos fotográficos, museográficos, gráficos, documentales, hemerográficos y otros. Un apartáu de Fondos sonoros, que se va abrir al públicu con 140 pieces representatives de la música y la tradición oral asturianes recoyíes ente 1979 y 2023. Estos primeros documentos sonoros editaos pertenecen a los conceyos de Castropol, Degaña, Santalla d'Ozcos, Cuideiru, Quirós y Llanes, y ente ellos hai grabaciones rexistraes a informantes sobresalientes, como Matilde Amieva (El Mazucu, Llanes), Dolores Fernández (El Rebol.lal, Degaña), Arcides y María González (Trabáu, Degaña), Matilde Díez (As Figueiras, Castropol), Antonio Villar (Ancadeira, Santalla d'Ozcos), etc.