El Día de les Lletres Asturianes vuelve a Madrid

El Día de les Lletres Asturianes vuelve a la capital d’España esti sábadu. La xornada, qu’entamen conxuntamente’l Centru Asturianu de Madrid y Iniciativa pol Asturianu, va entamar a les 17:30 hores con una ponencia d’Alma Hidalgo, vocal de Mocedá y Voluntariáu de l’asociación, baxo’l títulu ‘¿Hai futuru? Mocedá y tresmisión xeneracional’.

La lliteratura asturiana va tener un llugar importante nesta celebración. A les 18 hores, l’escritor y vocal de Formación d’Iniciativa pol Asturianu, Diego Solís, va presentar el so poemariu ‘Volvemos en 6 minutos’ qu’axunta poesía, imaxe y soníu. De siguío, a les 18:15 hores va tener llugar un recital poéticu con obres qu’apaecen na antoloxía ‘Surdiversu’, una obra de Berto García, editada por Cuatro Gotes, que recueye 50 años de poesía asturiana.

La xornada va continuar con Claudia Elena Menéndez, directora de la revista Formientu y vicepresidenta d’Iniciativa pol Asturianu, que va presentar el últimu númberu de la revista. Formientu ye una revista lliteraria moza fundada en Xixón nel añu 2006 col envís d'apurrir un espaciu pa los autores más mozos de la lliteratura n'asturianu. Ente les 18:30 y 19 hores va presentáse’l grupu d’Iniciativa pol Asturianu en Madrid que va tar coordináu pol sociu Víctor Manuel Fernández, vecín de Madrid pero d’ascendencia asturiana. Les actividaes van terminar con un homenaxe al Conceyu d’Asturies en Madrid nel 50 aniversariu de Conceyu Bable.