L'arte «made in Asturies» en LABoral Centru d'Arte

Llaboral Centru d'Arte y Creación Industrial inauguró la esperada esposición «Arte asturiano en residencia 2023». Esti eventu, que se va allargar hasta'l próximu 16 de payares, axunta a seis destacaos creadores procedentes d'Asturies: Guillermo Braga, Irene Cuesta, Chylo, Elise Florentino, Ana G. Argüelles y Alba Matilla. Toos y toes elles presenten los sos trabayos so la curaduría de Cristina Ramos, ufiertando una mirada crítica y contemporanea sobre diverses cuestiones actuales al traviés de les sos práctiques artístiques.

Les distintes obres presentaes tán formaes por una gran variedá de temátiques, materiales y estilos, pero comparten un interés común n'investigar y pensar sobre'l presente. Ente los diversos formatos que se presenten podemos ver el videu, la pintura, escultura, el corte en 3D, la fotografía ya inclusive propuestes mas tradicionales.

Guillermo Braga, fotógrafu y artista visual residente en Xixón presenta Corazón de Ballena (2024). El filme-performance funde proyecciones analóxiques, imaxes oceániques y soníos en vivu pa esplorar el misteriu del fondu marín, inspiráu nel corazón de la ballena. Col usu de dellos de proyectores sumaos a un sistema d'hélices qu'aprucen les proyecciones crea un efectu visual únicu qu'acompaña cola esperiencia sonora desenvuelta en collaboración con Santiago Fernández y Samuel Fonseca.

Irene Cuesta graduada en Creación y Diseñu, va esponer La escalera a mi jardín y unas flores robadas (2024), una obra qu'empezó nuna residencia en Praga, con dibuxos sobre la flora y que más tarde se materializó en Llaboral al traviés d'impresión 3D utilizando restos de metacrilato d'otros artistes pa crear ilustraciones con positivos y negativos d'imaxes.

Chylo, artista d'orixe polacu residente n'Asturies presenta Huba Iterform (2024), una instalación escultórica qu'esplora los políporos, fongos de soporte, como puntu de partida. La esposición fala sobre'l viaxe de les formes y como camuden y s'adapten. Huba Interform ye tamién un ecosistema modulable que camuda la so forma afaciéndose a diverses redolaes.

Elise Florentino presenta'l so proyectu Paraiso Ciguapa (2021), onde podrá vese la obra presenta Fileta’s Rockenroll Suicide (‘Live at Hammersmith Odeon’, London, 1973), un dibuxu qu'amuesa a Fileta, un personaxe que trata d'escapar d'una redolada que nun la reconoz. Esti ye'l primeru proyectu de dos obres centraos na cuestión afro.

Ana G. Argüelles presenta Ventiún branos na to ventana (2024), una pieza testil texida cola técnica de la malla lluanquesa qu'asonsaña la cortina de la cocina de la so güela, xuntu col vídeu Festina Lente (2024), que reflexona sobre la construcción y caltenimientu de la memoria al traviés de detalles cotidianos. Amás, la pieza testil amuésase sobre un bastidor construyíu pol güelu d'Ana, dándo-y entá más simbolismu a la obra.

Alba Matilla amuesa Santuario, un mundu virtual compuestu por dellos escaneos en 3D qu'acompaña de llenzos que desenvuelve mientres la so estancia na Llaboral. Alba Matilla emplega la fotogrametría pa recrear paisaxes rotos con una carga histórica y estética d'abandonu, xenerando un diálogu sobre la desindustrialización y les sos buelgues.