Más de cien empresarios firmen un manifiestu pola oficialidá

Un total de 110 empresarios (anque la firma pa sumase al manifiestu sigue abierta) tan acabante de firmar el manifiestu El mundu emprendedor y profesional pola oficialidá, un documentu nel que amuesen la so postura a favor de la oficialidá del asturianu y l'eonaviegu, onde destaquen qu'esti cambéu nel estatutu supondría «una comunidá con mayor autoestima y querencia polo propio, coles ventayes qu'ello va trayer pa la xeneración d'economía llocal y puesta en valir de la marca Asturies».

El manifiestu pon les mires na oficialidá de la comunidá vecina, argumentando que «nun hai otra forma, nun esiste otra solución que l’asunción del mandatu constitucional de la declaración d’oficialidá. Ye lo qu’ocurrió n’otres comunidaes como Galicia, y nun ye entendible qu’equí nun seya posible un pactu ente los principales partíos, PP y PSOE, qu’ellí sí fueron quien a apautar la oficialidá de la so llingua propia va munches décades». Los firmantes añeden amás que «ye clave que superemos esta falta de protección del patrimoniu llingüísticu d’Asturies y de los derechos de les persones que quieren facer usu de les llingües d'Asturies nel so día a día, como ciudadanos o como empreses».

Esti manifiestu anúnciase nel contestu de negociaciones abiertes ente los grupos parllamentarios pa incluyir la oficialidá nel Estatutu d'Autonomía, nel que la FSA-PSOE, Podemos ya Izquierda Xunida tan a favor d'esi cambéu nel marcu llegal, pero non los partíos de derecha y estrema derecha.