Misiva pon fin a una trayectoria de 14 años esti vienres en Grau

Esti vienres, 17 de mayu, va marcar la final de la hestoria del grupu punk-rock asturianu col últimu conciertu del grupu Misiva, dempués de 15 años de formación musical. Esti eventu, «La Última Misiva», zarra un capítulu na hestoria de la banda, y promete ser una despidida inolvidable pa los sos siguidores. El conciertu de despidida va ser na Pista Polideportiva El Frontón de Grau dende les 22:00, con el grupu tributu Tribute Against de Machine como teloneros. Tamién va haber tiempu pa les sorpreses y collaboraciones.

El grupu, formáu en Grau, Asturies, en 2009, foi un referente na escena local y contribuyó significativamente a la promoción y espardimientu de la llingua asturiana al traviés de la so música. Con un estilu enérxicu y lletres cargaes de mensaxe, Misiva dexó una marca indeleble nel panorama musical asturianu.

Nun par d'anuncios publicaos na so cuenta de Instagram, los miembros de Misiva compartieron los sos motivos pa poner fin al so tiempu como grupu, asegurando que nun hai razones más allá de querer zarrar esti capítulu de les sos vides y dar pasu a una nueva vida. «Queremos poner el broche final a esta parte tan importante de la nuesa vida y queremos que la despidida seya daqué inolvidable», espresaron.

Nestes mesmes publicaciones n'Instagram, espresaron los postreros trés conciertos del grupu. El primeru asocedió nel Festival Internacional de Cerveza Artesano de Llangréu y el segundu nel Vidiago Rock el 3 de mayu. L'últimu conciertu de despidida va tener llugar nel mesmu llugar onde too empezó, Grau, añediendo un toque de señardá y significáu a la ocasión.

Los siguidores del grupu y los amantes del punk rock asturianu tán convidaos a ser parte d'esti eventu históricu que marca la fin d'una dómina y l'empiezu de nueves aventures pa los fans de Misiva.