Barbón invita a los grupos parlamentarios a reformar l'Estatutu y llograr la oficialidá

Pa ello, el presidente asturianu va convocar a los grupos parlamentarios a una xunta que se va celebrar na segunda quincena d'esti mes pa negociar la reforma del artículu 4 del Estatutu d'Autonomía ya impulsar la oficialidá de les llingües propies de la comunidá: l'asturianu y l'eonaviegu. Adrián Barbón esplicó que l'Executivu autonómicu va llevar una propuesta de cambéu a esi alcuentru, al que va convidar tamién a Xosé Antón González Riaño, presidente de l'Academia de la Llingua Asturiana, col fin de buscar un consensu qu'hasta agora nun foi posible.

Barbón comprometióse a «llegar hasta'l final» nesti procesu, lo qu'implica la presentación d'una proposición de llei na Xunta Xeneral p'abordar el cambéu del artículu 4. Si esa propuesta se tomara en consideración, empecipiaríase l'alderique na comisión parlamentaria correspondiente y zarraríase un testu que tendría de votase depués nel plenu. «Hai que pasar del dichu al fechu y amosar que somos asturianistes, con fechos concretos, y eso faise con una votación. Al pueblu asturianu yá nun-y sirven les medies tintes», indicó.

Nesi sen, recordó que se necesiten 27 votos a favor pa llevar a cabu la reforma del Estatutu y que la oficialidá seya una realidá. Dirixóse de manera concreta a los diputaos del Partíu Popular nel parllamentu, pa que «reflexonen y seyan audaces» y que miren d'exemplu a los sos compañeros de partíu en Galicia, con una postura diferente no que cinca a la cuestión identitaria y llingüística. «Énte una votación definitiva del cambéu del artículu 4 tienen de votar a favor, porque en casu contrariu nun va haber oficialidá, nun va valir con que queden cola astención», remarcó Barbón.