Gutiérrez afirma que'l Plan de Normalización ta mui avanzáu y espera que llegue a la Xunta Xeneral «bien ceo»

La conseyera de Cultura, Política Llingüística y Turismu, Vanessa Gutiérrez, afirmó que'l trabayu pa la ellaboración del Plan de Normalización del Asturianu nuevu ta «mui avanzáu» y espera que llegue a la Xunta Xeneral «bien ceo».

En declaraciones a los medios na presentación de la programación de la Selmana de les Lletres Asturianes, la conseyera resaltó que nos últimos meses «yá se van viendo los trabayos d'esti Gobiernu, los avances que se tán dando» en cuestiones relatives a la promoción de les llingües propies.

Asina, recordó que'l vienres pasáu la Conseyería d'Educación anunciaba la inclusión de la enseñanza del asturianu y del gallego-asturianu nes escueles de 0 a 6. «Una reivindicación histórica y un pasu alantre mui importante pa la tresmisión de les nuestres llingües a les futures xeneraciones», afirmó.

Ye ún de «los trés grandes anuncios» en materia llingüística del Executivu xunto cola ellaboración del Plan de Normalización y la reforma de la Llei d'Usu del Asturianu, afirmó Gutiérrez, qu'indicó que se van dir produciendo más anuncios pa desenvolver la llexislación actual, «que ye'l marcu nel que movemos y nel que vamos siguir desenvolviendo y implementando midíes a lo llargo d'estos años».

Too eso mentes nun haya na Xunta Xeneral mayoría abondo pa poder reformar l'Estatutu d'Autonomía y poder incluyir la oficialidá, «que ye'l marcu llegal afayadizu», destacó la conseyera.