El Ministeriu insiste na necesidá de que l'asturianu sía oficial pa poder aprobar la especialidá docente

La ministra d'Educación, Pilar Alegría, repitió a la conseyera del ramu del Principáu, Lydia Espina, que ye necesario aprobar la oficialidá del asturianu pa poder crear la especialidá docente de Llingua Asturiana y Lliteratura.

A la xunta celebrada en Madrid asistieron tamién el secretariu d'Estáu d'Educación, José Manuel Bar, y la directora xeneral d'Evaluación y Cooperación, Mónica Domínguez, y ellí Espina aprovechó pa comentar a la ministra los sos planes sobre la enseñanza del asturianu.

Nesi sentíu, recordó-y lo importante que sería poder crear la especialidá docente pa llograr la estabilización d'alredor de 300 profesionales. Sicasí, al igual que fixo nun alcuentru asemeyáu en 2022, al que tamién asistió la conseyera de Cultura, Política Llingüística y Turismu, Berta Piñán, dende'l ministeriu falaron de «problemes xurídicos» p'aprobar la especialidá d'una llingua que nun ye oficial.

L'aprobación de la Especialidá Docente pal profesoráu d'Asturianu esixe un cambiu nos reales decretos d'especialidaes, que son competencia del Ministeriu. Nellos, tien qu'establecese que pue aprobase la especialidá docente pa llingües qu'anque nun son oficiales tienen protección llegal y una política llingüística desenvuelta pola comunidá autónoma, como ye'l casu de la llingua asturiana.

Especialidá d'asturianu

La demanda de reconocimientu y creación de la Especialidá Docente del Profesoráu de Llingua Asturiana y Lliteratura al Ministeriu d'Educación pola sociedá asturiana y por delles instituciones como la Xunta Xeneral, la Conseyería d'Educación o'l mesmu Conseyu Escolar del Estáu, amás de los principales sindicales educativos, vien siendo una constante dende l'añu 2005.

Nel ámbitu políticu, tolos partíos asturianos apoyen esta midida o, a lo menos, lleváronla en dalgún momentu nel so programa. Mesmamente, nel 2009, el PP foi'l que presentó na Xunta Xeneral una proposición non de llei pa la creación de la especialidá docente d'asturianu.

El Parllamentu asturianu aprobó nos últimos años delles resoluciones pa que dende Madrid punxeren en marcha esta midida, anque'l PP suel votar en contra. Nel 2014, l'apoyu a la creación de la especialidá sumó a PSOE, IX, Foru Asturies y UPyD.

N'ochobre del 2021, la Comisión d'Educación y FP del Congresu aprobó, colos votos a favor de tolos grupos menos PP, Vox y Cs, una proposición non de llei del Grupu Parllamentariu Confederal d'Unidas Podemos-En Comú Podem-Galicia en común, pola que se reclamaba al Gobiernu a reconocer y crear la Especialidá Docente del Profesoráu de Llingua Asturiana y Lliteratura, informa Europa Press.