Pueblos celtes en xermandía

Les naciones ensin estáu d’Europa son unos pueblos que viven dientro de los estaos- nación que conformen, por exemplu, la Xunión Europea. Estos estaos-nación han descentralizase per un llau y per otru ceder soberanía en favor de la XE.

Ún de los venceyos nos que s’organicen son les naciones celtes. Al traviés de, por exemplu, la federación de les lligues celtes llogren rescatar tradiciones y cultures asemeyaes que van de la mar Cantábrica a la mar d’Irlanda.

Dempués de la romanización de dellos, sacante Irlanda y Escocia, vieno un tiempo d’enfocase a la mar mediterránea, que franció les vieyes rellaciones d’estos pueblos atlánticos.

Agora, les sos llingües y cultures tienen más proteición al facer parte del mesmu conxuntu políticu supraestatal, la XE. Magar que’l Brexit dexara albentestate la xunión de la islla d’Irlanda y la pertenencia d’Escocia y otros a esti marcu común. Nesti casu caberu tienen plantegao un segundu referendu d’independencia pa tornar a la XE. La Islla de Man, Gales y Cornualles tiénenlo entá más difícil, pel momentu.

De toles formes, na estaya cultural hai rellaciones cada vegada más fonderes ente les ocho naciones celtes reconocíes del occidente continental. Celtia sedría’l so nome y el trisquel el so símbolu compartíu. Les dos naciones del sur: Galicia y Asturies, falen llingües romániques anque caltienen un sustratu llingüísticu y muncha toponimia prerromana. Pero’l restu de les sos señes d’identidá caltienen l’espíritu célticu. Les otres seyes falen entá idiomes celtes magar que seya de mou minoritariu.

L’aventura europea de Celtia apurre una ocasión d’axuntar otra vegada a pueblos que tuvieron coneutaos dende enantes de la dómina d’anguaño. N’Asturies, dátase dende la fin de la Edá del Bronce a la Edá de Fierro, inclusive dempués de la so conquista polos romanos nel añu 19 (e.C.).

Na Europa de la cultura y los drechos humanos, ye interesante’l fomentu de les rellaciones ente los pueblos que la formen, seya esta la sida o seyan otres les formes d’encadarmase. Una de les posibilidaes ye la Celtia nel marcu del Arcu Atlánticu.

Non solo pue facese l’articulación europea al traviés d’una federación d’estaos-nación. Hai que decatase que la Hestoria nun ñaz dempués de la II guerra mundial. Ye más llarga y les formes de reconocela y reconocese tamién son más variaes. La Hestoria anuévase de mou insospecháu delles vegaes. Non en devanéu esti añu n’An Oriant / Lorient entamó’l I Foru Celta, con esi mesmu envís.

La xermandá ye l’alcuentru de dos llocalidaes que deciden facer pública la so xermandía p’actuar dientro d’una perspeutiva europea, pa contrastar los sos problemes y desendolcar ente ellos unos llazos d’amistanza cada vegada más estrenchos. Según el CMRE (Conseyu de Municipios y Rexones d’Europa) dempués de la II Guerra Mundial, polos valires d’amistanza, cooperación y comprendoria ente los pueblos d’Europa.

N’Asturies hai seyes pueblos en xermandía con otros seyes pueblos celtes, de Bretaña ya Irlanda:

• Avilés con Sant Nazer (Bretaña hestórica)
• Morcín con Eskuz (Bretaña)
• Nava con Kloar-Karnoed (Bretaña)
• Parres con Zinzag-Lokrist (Bretaña)
• Pravia con Pont-Skorf (Bretaña)
• Tazones con An Com (Irlanda) y Groñvel (Bretaña)

D’esta miente los pueblos en xermandía en Bretaña ya Irlanda, puen ufiertar venceyos de toa triba colos sos pares asturianos.

La xermandía colos pueblos celtes ye un recursu al algame de tolos pueblos de la Celtia. Poro, nun tiene que llendase a Bretaña o Irlanda, tamién Gales, Escocia y el restu son oxetivos p’anubrir la cobertoria qu’ufre esta posibilidá de xuntanza pola mor de los raigaños.

La conexón real de los pueblos celtes europeos per aciu la so xermandía tien el xeitu d’un afondamientu de les sos rellaciones reales acullá de los meros formalismos llexislativos.

Una mena de recuperanza na actualidá de la xunión de los mesmos tres tantos sieglos d’alcuentros cola mar Celta pel mediu.

Según Floro, yá se citaben «naciones xermanaes» celtes como güei se fala de «ciudaes xermanaes»*.

* Salinas de Frías, M. (2006) Los pueblos prerromanos de la península Ibérica, p: 96.