Llanes quier más frecuencies ferroviaries

El Conceyu de Llanes comunicó que va treslladar a ADIF la petición de caltenimientu de les llinies yá existentes, amás de l'ampliación con frecuencies ferroviaries nueves.

«Nes ales d'Asturies tenemos un déficit importante en servicios de tresporte públicu, lo que constitúi un hándicap pa conceyos como'l nuestru», señaló l'alcalde de Llanes, Enrique Riestra, al traviés de nota de prensa.

Nesi sentíu, recordó la importancia pal sector turísticu, pero tamién pa les zones rurales pol retu demográficu y énte el procesu de descarbonización, porque «el ferrocarril ye'l tresporte más sostenible y ecolóxicu».

«Agora que l'alta velocidá va llegar finalmente a Asturies, paez el momentu afayadizu pa reforciar el serviciu ferroviariu a les ales de la rexón, que nun podemos quedar una vez más al marxe de les meyores si nun queremos convertinos en parte de la 'España vaciada'», indicó'l primera edil.

Riestra indicólo asina depués de que'l Conceyu de Llanes completara l'últimu pasu pa la firma del conveniu col Alministrador d'Infraestructures Ferroviaries (ADIF) de cara a la supresión de pasos a nivel nel conceyu, amás de pal refuerciu de los que se caltengan, cola ellaboración del informe de valoración económica de les espropiaciones necesaries pa eso.

Esti informe, realizáu por técnicos municipales de patrimoniu, cifra en 150.000 euros esa cantidá que, según l'alcuerdu alcanzáu col alministrador ferroviariu, va tener que ser apurrida pol Conceyu.

El conceyu de Llanes tien na actualidá 80 pasos a nivel, ún de los conceyos con mayor númberu n'España. L'estudiu integral presentáu por ADIF preve actuar sobre 54. D'ellos, 36 van clausurase.